नेपालगञ्जमा सत्–मार्ग प्रशिक्षण शुरु



ओएस नेपाल, पोखरा, १० पुस । सत्–मार्ग अभियान नेपालको मध्यपश्चिमाञ्चल क्षेत्रस्तरीय सत्–मार्ग प्रशिक्षण वर्ग कार्यक्रम पौष ९ गतेदेखि १३ गतेसम्म चल्ने गरी बाँकेको नेपालगञ्ज उपमहानगरपालिका वाटरपार्क स्थित श्री शिवशङ्कर पार्वतीदेवि धर्मशाला प्राङ्गणमा सञ्चालन भएको छ । दाङ्ग जिल्लाका प्रमुख जिल्ला अधिकारी श्री परशुराम अर्यालज्यूबाट दीपप्रज्वलन तथा ध्वजपूजन गरी ९ गते साँझ सो कार्यक्रमको समुद्घाटन भएको छ ।
satmarga
यस भूमिको राष्ट्र–राष्ट्रियता, संस्कृति, परम्परा, सभ्यता, धर्म–दर्शन, मौलिकता जस्ता विषयहरुमाथि बलात् बाह्य हस्तक्षेप हुनेक्रम बढ्दै गएको, राजनीतिकक्षेत्रमा प्रतिनिधित्त्व गर्ने प्रतिनिधितहमा पराश्रित मानसिकता हावी भएको, नेपालको मुख्य–मुख्य पहिचानहरु नै हराउने तथा आयातित पहिचान लादिने खतरा बढेर गएको वर्तमान परिपेक्षमा यस भूमिको विशेष विशेष पहिचानको संरक्षण संवर्धन प्रवर्धन गर्दै राष्ट्र पुनःनिर्माणको लागि व्यक्तिमा व्यक्तित्त्व र सच्चरित्रवान नागरिक उत्पादन गर्ने कार्यलाई लक्ष्य बनाएर देशका स्थान स्थानमा तत्सम्बन्धित प्रशिक्षण कार्यक्रम गर्दै आएको सत्–मार्ग अभियान नेपालले यस पटक नेपालगञ्जमा आफ्नो कार्यक्रम सञ्चालन गरेको छ ।

विश्व हिन्दू महासंघका केन्द्रीय उपाध्यक्ष तथा नेपाली काँग्रसका पूर्व सभासद् डा. मिठाराम विश्वकर्मा, ब्रह्माण्डीय सनातन धर्म महासभाका केन्द्रीय महासचिव श्री दीपक सुवेदी, सत्मार्ग अभियानका राष्ट्रिय महासचिव श्री खेमनाथ आचार्य, जनजाति कल्याण आश्रमका महासचिव श्री प्रेम थुलुङ्ग, गौरी शङ्कर संस्कृतग्राम रामेछापका अध्यक्ष तथा धार्मिक कार्यक्रम प्रस्तोता श्री जनार्दन घिमिरे, संस्कार पाठशाला अभियानकी संयोजक श्री देवि घिमिरे, शिक्षासेवी श्री ध्रुव अर्याल, सनातन धर्म–अध्यात्मका वैज्ञानिक प्रवचक श्री चैतन्यकृष्ण, साइन्स एण्ड साइन्सटिस्ट संस्थाका अन्तराष्ट्रिय ख्यातिप्राप्त वैज्ञानिकहरु  लगायतका विशिष्ट महानुभावबाट सो प्रशिक्षण कार्यक्रममा सम्बोधन तथा बौद्धिक प्रवचन दिने कार्यक्रम रहेको संयोजक श्री गोविन्द पहाडीले न्यूज टिमलाई बताउनु भएको छ ।

प्रशिक्षण कार्यक्रम विहान ५:०० बजेदेखि राती १०:०० बजेसम्म सञ्चालन हुने बताइएको छ । सहभागी प्रशिक्षार्थी र बौद्धिक व्यक्तित्त्वहरुलाई आवासको व्यवस्था कार्यक्रम आसपासमै गरिएको छ । कार्यक्रममा ३०० भन्दा बढी प्रशिक्षार्थीहरुले सहभागिता जनाउने, कार्यक्रम बिहान जागरणसँगै एकात्मक स्तोत्रपाठ (राष्ट्रिय पहिचानका विषय, तीर्थस्थल, मठमन्दिर, देवालय, विभूतिपुरुष, मातृशक्ति आदिको सम्झना तथा स्तुति)बाट शुरु हुने, क्रमशः योगाभ्यास तदन्तर बौद्धिक प्रवचनहरु हुने, दिउसो एक चरण खेल खेलाइने, साझको भोजन पछि सहभागी प्रशिक्षार्थीहरुमा रहेको प्रतिभा प्रस्फुटनको बारेमा चर्चा गरिने आदि रहको आयोजकले बताएका छन् ।

प्रशिक्षण कार्यक्रमको समापन लगत्तै १३ गते नै पत्रकार सम्मेलन गरी हिन्दूराष्ट्र संस्थागतका लागि संघर्षको कार्यक्रमको घोषणा गरी सञ्चारक्षेत्रलाई जानकारी गराइने योजना रहेकोसमेत स्रोतले बताएको बुझिएको छ ।

Comment