भारी वर्षाका कारण खोटाङमा यातायात सेवा अवरुद्ध



khotangओएस नेपाल, खोटाङ, १८ फागुन- भारी वर्षाका कारण खोटाङमा यातायात सेवा अवरुद्ध भएको छ । दुई दिनेदेखि लगातार परेको वर्षाका कारण दिक्तेल–हलेसी, दिक्तेल–फोक्सिङटार, दिक्तेल–जालपा, दिक्तेल–लामीडाँडा, दिक्तेल–पाथेकालगायतका सडकखण्डमा यातायात सेवा अवरुद्ध भएको हो ।

वर्षाको पानीले कच्ची सडक हिलाम्मे बनेपछि र सवारीसाधन सडकमै भासिन थालेपछि यातायात सेवा अवरुद्ध भएको यातायात व्यवसायी सङ्घ खोटाङका सचिव रामकुमार हिङ्माङले जानकारी दिए ।

सदरमुकाम दिक्तेलबाट मुढेसम्म गाडी उक्लिन नसकेपछि सवारी आवतजावत बन्द भएको दिक्तेल काउन्टरका कर्मचारी अमिर अधिकारीले बताए । उनले भने, “जिल्लाबाट छुट्ने कुनै पनि सवारीसाधन पठाउन सकिएको छैन, अन्यत्रबाट जिल्ला भित्रिने सवारी पनि बीचैमा रोकिएका छन् ।”

यातायात सञ्चालन नहुँदा सदरमुकामबाट तराई बाहिरिने र तराईबाट सदरमुकाम भित्रिने यात्रुहरु मारमा परेका छन् । कालोपत्रेका लागि सडक चौडा पार्न स्काभेटर प्रयोग गरिएका कारण यस्तो समस्या आएको सचिव हिङ्माङको भनाइ छ ।

कालोपत्र गरिसकिएको हलेसी–जयराम सडकखण्डमा भने यातायात सेवा सुचारु रहेको सङ्घले जनाएको छ । जिल्लामा एक सय १७ यात्रुबाहक बस, २२ जिप, ५५ ट्र्याक्टर र ४५ ट्रक सञ्चालनमा छन् । रासस

Comment