OSNepal आइतबार, मंसिर १२ २०७८

काठमाडौँ महानगरपालिकाद्धारा मधुमेही समाजलाई १० लाख सहयोग

काठमाडौँ महानगरपालिकाद्धारा मधुमेही समाजलाई १० लाख सहयोग

  • OSNepal
  • शुक्रबार, मंसिर ३ २०७८


काठमाडौँ महानगरपालिकाद्धारा मधुमेही समाजलाई १० लाख सहयोग
Reading Time: < 1 minute

काठमाडौँ – काठमाडौँ महानगरपालिकाले मधुमेह रोग पहिचान, रोकथाम र नियन्त्रणका लागि नेपाल मधुमेही समाजलाई रु १० लाख सहयोग गर्ने भएको छ । विश्व मधुमेह दिवस २०२१ को सन्दर्भमा आयोजित कार्यक्रममा कामपा स्वास्थ्य विभाग र मधुमेही समाजबीच सम्झौता भएको हो ।

सम्झौताबमोजिम ज्येष्ठ नागरिकको परीक्षण निःशुल्क हुनेछ । यसमा चिनी रोग, अक्सिजनको मात्रा, रक्तचाप, परीक्षण निःशुल्क हुनेछ । यस परीक्षणबाट रोगको लक्षण देखिए थप उपचारका लागि पठाइनेछ । यसरी हुने उपचारमा नाम दर्ता, परामर्श, इसिजी, इको, भिडियो एक्स–रे, मुटु, मिर्गौला, कलेजो, प्रोस्टेडलगायतका परीक्षण निःशुल्क हुनेछन् । यसका लागि कामपाले समाजलाई आउँदो असार मसान्तसम्मका लागि रु १० लाख अनुदान रकम उपलब्ध गराउनेछ ।

सोही अवसरमा कामपा प्रमुख विद्यासुन्दर शाक्यले अहिले सबै घरघरमा मधुमेहका बिरामी हुनसक्ने भन्दै यसबाट हुनसक्ने जोखिम कम गर्नका लागि सबै सजग हुनुपर्ने बताउनुभयो । राजधानी बाहिरका नागरिकले उपचारका लागि काठमाडौँ आउनु नपर्ने र देशका कसैले पनि विशेषज्ञ स्वास्थ्य सेवाका लागि विदेश जानु नपर्ने अवस्था ल्याउन कामपाले स्वास्थ्य क्षेत्रमा लगानी बढाएको उहाँको भनाइ थियो ।

यसअघि पनि कामपाले निःशुल्क डायलायसिस सेवाका लागि नेपाली सेनासँग सहकार्य गरेको छ । निकट भविष्यमा नै नेपाल प्रहरीसँग सहकार्य गरिने बताइएको छ । अहिले निःशुल्क एम्बुलेन्स सेवा सञ्चालनमा छ । दोस्रो चरणको कोरोना महामारीका समयमा १२ वटा अस्पतालसँग सहकार्य गरी सेवा विस्तार गरिएको प्रमुख शाक्यले जानकारी दिनुभयो । विश्वका हरेक १० मध्ये एक जनाको अनुपातमा मधुमेहको समस्या रहेको तथ्याङ्कले देखाउँछ । हरेक वर्षको नोभेम्बर १४ तारिखका दिनलाई विश्व मधुमेह दिवसका रूपमा मनाइन्छ ।

प्रतिक्रिया
सम्बन्धित समाचार

  • फेसबुक
  • ट्वीटर
  • युट्युब
  • A यूनिकोड