बर्दियामा करेन्ट लागेर हात्तीको मृत्यु भएको आशंका: पोस्टमार्टम पछि मृत्युको कारण खुल्ने — OSNepal

बर्दियामा करेन्ट लागेर हात्तीको मृत्यु भएको आशंका: पोस्टमार्टम पछि मृत्युको कारण खुल्ने

LC (KTM) January 04, 2022 0

बर्दिया । बर्दियामा करेन्ट लागेर हात्तीको मृत्यु भएको आशंका गरिएको छ । जिल्लाको राजापुर नगरपालिका वडा नंवर १० ढुंडिपुरमा भाले हात्ती मृत फेला परेको छ । मृत फेला परेको हात्तीको सुंड र खुट्टामा जलेको जस्तो कालो घाउ देखिएकोले हात्तीलाई करेन्ट लागेको आशंका गरिएको छ । हात्तीको मुखबाट फिँज निस्किएको देखिन सकिन्छ ।

डिभिजन बन कार्यालय बर्दियाका प्रमुख डिभिजनल प्रवीण बिडारी, सशस्त्र प्रहरी कार्यालय, बिओपी भग्रैयाका प्रहरी निरीक्षक अस्मित चौहान मगर, सशस्त्र बन रक्षकको टोली, राष्ट्रिय प्रकृति संरक्षण कोषको प्राबिधिक टोली, बर्दिया राष्ट्रिय निकुञ्जको टोली घटनास्थलमा रहेको छ ।

डिभिजन बन कार्यालय बर्दियाका प्रमुख डिभिजनल प्रवीण बिडारीले घटनाको अनुसन्धान भइरहेको बताउनुभयो । उहाँले भन्नुभयो, “प्वाइजनिङ पनि हुन सक्छ करेन्ट लागेर मृत्यु भएको पनि हुन सक्छ, अनुसन्धान हुँदैछ, वास्तविक कारण भने पोस्टमार्टम पछि मात्र थाहा हुने छ ।”

घटनाको बारेमा ११ बजे थाहा भएको र तत्पश्चात आफुहरु घटनास्थलमा आएको बताउँदै उहाँले भन्नुभयो, “हामी आएर हात्तीको शव छाम्दा तातो थियो, स्वस्थ वयस्क हात्ती हो भन्ने प्रारम्भिक अनुसन्धानमा थाहा भयो, अब थप अनुसन्धान हुँदैछ । नाप जाँच मुचुल्का, घटनास्थल प्रकृति मुचुल्का उठाउँदै छौँ । पोस्टमार्टम पछि सबै कुरा थाहा हुन्छ ।”

पोस्टमार्टम गर्नकालागी प्रकृति संरक्षण कोषको टोली घटनास्थलमा पुगेको छ । पोस्टमार्टम पछि मृत्युको कारण खुल्ने घटनास्थलमा रहेका अधिकारीहरुले जानकारी दिए ।

मंगलबार, पुस २०, २०७८ गते आज बिहान तोरी बारीमा स्थानियले मृत अवस्थामा हात्तीलाई देखेपछि डिभिजन बन कार्यालय बर्दियालाई जानकारी गराएका थिए ।

Leave a Reply

Your email address will not be published. Required fields are marked *

भर्खर