काठमाडौं, टेकु – काठमाण्डौं उपत्यका अपराध अनुसन्धान कार्यालय ललितपुरको मंगलबजारमा एक हृदयविदारक घटनामा ११ वर्षीय बालिकाको हत्या आरोपमा आफ्नै १५ वर्षीय दाजु पक्राउ परेका छन्।

भगवती बोहराले आफ्नी छोरी दुर्गा बोहरा मिति २०८१/१२/०४ गते राति ९:३० बजेबाट हराएको भन्दै जिल्ला प्रहरी परिसर ललितपुरमा निवेदन दिएपछि खोजी कार्य सुरु गरिएको थियो। अनुसन्धानकै क्रममा मिति २०८१/१२/२९ गते बिहान करिब ११:०० बजे ललितपुर महानगरपालिका वडा नं. ९ स्थित बाबुराजा अवालेको पुरानो घरको भुइँतलामा रहेको प्रयोगविहीन पानी ट्याङ्कीमा दुर्गाको सडेगलेको शव फेला परेको हो।

काठमाण्डौं उपत्यका अपराध अनुसन्धान कार्यालय, PRCB ललितपुर र जिल्ला प्रहरी परिसर ललितपुरको संयुक्त अनुसन्धानमा विभिन्न प्रविधिको प्रयोग गरी गरिएको अनुसन्धानबाट दुर्गाकै १५ वर्षीय दाजुले हत्या गरेको पुष्टि भएको छ। उनी मिति २०८२/०१/०१ गते मंगलबजार क्षेत्रबाट नियन्त्रणमा लिइएका हुन्।

अनुसन्धानबाट खुलेका तथ्यहरूः

• मृतक दुर्गा बोहरा बझाङको स्थायी बासिन्दा हुन् र हाल ललितपुरको मंगलबजारमा परिवारसँग बस्दै आएकी थिइन्।
• हत्या भएको भनिएको घरमा उनीहरूको परिवार यसअघि डेरा गरी बस्दै आएको थियो तर मिति २०८१/११/२५ मा अन्यत्र सरेको थियो।
• त्यही पुरानो डेरामा २०८१/१२/०४ गते दुर्गा र उनका दाजु गएका थिए। CCTV फुटेजमा दुवै जना देखिएका थिए।
• घटनास्थलमा सामान्य विवाद भएपछि दाजुले बहिनीलाई पिटेर डोरीले घाटी कसेर हत्या गरेको बयान दिएका छन्।
• दाजुले लागुऔषध सेवन गरेका कारण होसमा नरहेको र पछि होस खुलेपछि मृत शरीरलाई पानी ट्याङ्कीमा हालेर सिमेन्टको ढकनीले छोपेको बताएको प्रहरी स्रोतको भनाइ छ।

हाल घटनाका थप अनुसन्धान तथा कानुनी प्रक्रिया अघि बढाउन आरोपीलाई जिल्ला प्रहरी परिसर ललितपुरमा पठाइएको छ।