शिर्षक – बाल संज्ञान
आजको खल्लो दृश्यमा ती रङ्ग नै कहाँ छन् र!
इन्द्रधनुषका गोरेटोमा हिँड्दा त कहिले पातालका गहिराइ नापिँदा,
निश्चल, निष्कपट मुस्कान बोक्दै बालखामा चाखिएको ब्रह्माण्डको स्वाद!
आजको हल्लामा त्यो मौनता नै कहाँ छ र!
चमत्कारी ती शब्द, जसलाई कुनै अर्थ चाहिन्नथ्यो,
केही डर अनि हजारौँ निशब्द सपना बोक्दै,
दीक्षा बिना उब्जिएका ती प्रेमभाव!
आजको सत्यतामा त्यो निष्ठा नै कहाँ छ र!
सुनकेस्री कपाल, कैयौँ चमत्कार सुन्दै,
वायुपंखी अश्व चढी अनेक लोक घुम्दै,
मिथ्या समेत चोख्याउने ती निष्कलंक साथ!
आजका सोधमा गहिराइ नै के छ र!
गतिशीलतासँगै अनेक लहरहरू बटुल्दै,
बातैपिच्छे अनन्त उत्तर खोज्दै,
मूल्याङ्कन होइन, साथ रोज्ने ती प्रश्नहरू!
कति मिठा! कति सुन्दर! कति निश्चल! कति घनीभूत!
बालखामा चाखिएको त्यो ब्रह्माण्डको स्वाद!
– उमङ्ग शाह
