मनकामनामाइले हामी सबैको रक्षा गरुन, हेर्नुहोस आजको राशीफल




सूर्य शौर्यमथेन्दुरुच्चपदवीं सन्मङ्गलं मङ्गलं । सद्वुद्धिं च वुधो गुरुश्च गुरुतां शुक्रः शुभं शं शनिः ।।
राहुर्वाहुबलं करोतु सततं केतुः कुलस्योन्नतिं । नित्यं प्रीतिकरा भवन्तु मम ते सर्वेऽनुकूला ग्रहाः ।।

पञ्चाङ्ग
श्रीसूर्य उत्तरायण,वसन्तर्तुः,विरोधकृत् नाम संवत्सर,श्रीशाके १९४०,विक्रम सम्वत २०७५ साल चैत्र २२ गते शुक्रबार नेपाल सम्बत ११३९ चिल्लागा,सन् २०१९ अप्रिल ५ तारिक कृष्णपक्ष र्आैसी तिथि अपरान्ह २ वजेर ७ मिनेटसम्म उप्रान्त शुक्ल पक्ष प्रतिपदा तिथि,रेवती नक्षत्र अहोरात्र,ऐन्द्रियोग,नागकरण,आनन्दादियोग श्रीवत्स,सूर्य मीन राशीमा, चन्द्रमा पनि मीन राशीमा । योगिनी ईशान्य,काल राहु आग्नेय र पाश वायव्य दिशामा,शुक्र पूर्व र चन्द्रमा उत्तर दिशामा भ्रमण गरिरहेका छन् ।
यात्र र युद्धमा सम्मुख काल पाश पार्नु हुदैन । काल दाहिने र पाश देव्रे शुभ हुन्छ । जुवा खेल्न,बहस गर्न,यात्रा र सङ्ग्राममा सम्मुख योगिनी वर्जित छ भने आफ्नो राशिमा चन्द्रमा हुदा यात्रा,युद्ध,विवाह, क्षौर कर्म र गृहप्रवेश गर्नु उचित मानिन्न । यात्रा गर्दा विशेष गरेर स्त्री जातिको लागि दाँया र सम्मुख शुक्र अशुभ मानिन्छ ।

मुहूर्त
शुभ अभिजित मुहूर्तः–पूर्वान्ह ११ वजेर ४२ मिनेटबाट मध्यान्ह १२ वजेर ३२ मिनेटसम्म रहनेछ । सामान्य गुली काल मुहूर्तः–विहान ७ वजेर २६ मिनेटबाट ९ वजेसम्म रहनेछ । अशुभ राहुकाल मुहूर्तः–विहान १० वजेर ३४ मिनेटबाट मध्यान्ह १२ वजेर ८ मिनेटसम्म रहनेछ । अशुभ यमघण्टायोगः–अपरान्ह ३ वजेर १५ मिनेटबाट ४ वजेर ४९ मिनेट सम्म रहनेछ । अशुभ दूरमुहूर्तः– विहान ८ वजेर २२ मिनेटबाट ९ वजेर १२ मिनेटसम्म र मध्यान्ह १२ वजेर ३२ मिनेटबाट अपरान्ह १ वजेर २२ मिनेटसम्म रहनेछ ।

बार वेला
सूर्योदयबाट प्रातः ७ वजेर २६ मिनेटसम्म चर वेला,७ वजेर २६ मिनेटबाट ९ वजेसम्म लाभ वेला,९ वजेबाट १० वजेर ३४ मिनेटसम्म अमृत वेला,१० वजेर ३४ मिनेटबाट १२ वजेर ८ मिनेटसम्म काल वेला,१२ वजेर ८ मिनेटबाट १ वजेर ४१ मिनेटसम्म शुभ वेला,१ वजेर ४१ मिनेटबाट ३ वजेर १५ मिनेटसम्म रोग वेला,३ वजेर १५ मिनेटबाट ४ वजेर ४९ मिनेटसम्म उद्वेग वेला र ४ वजेर ४९ मिनेटबाट सूर्यास्तसम्म चर वेला रहनेछ ।

मेषः– अपूर्ण,अस्थिर र आत्म गलानी हुने काम हुनसक्छ । जवर्जस्ति कहि केहि नगर्नु होला । सहयोगको आशा गरेका ठाँउबाट निराशा भएर फर्किनु पर्नेछ । विना तयारी काममा लाग्दा काम विग्रिने छन् । मिथ्या आरोप लाग्न सक्छ सर्तक रहनु होला । नयाँ क्षेत्रमा लगानी नबढाउनु होला । धन दिएर मित्रलाई आफुबाट टाढा नबनाउनु होला ।

वृषः– लगनशिलता बढाउनु होला । समयमा गरेका कामबाट राम्रै उपलब्धि हात लाग्नेछ । चित्त सानो गरेर काम नगर्नु होला । आज गरेका प्राय काम सफल हुने छन् । व्यापार व्यवसायबाट आय बढ्नेछ । घरमा पारिवारिक जमघट बढ्नेछ । पढाई लेखाईमा प्रगति हुनेछ । पापीहरु आफै टाढा हुनेछन् भने सहयोग मन सहकार्य गर्दै अगाडि बढ्ने छन् ।

मिथुनः– आत्मबल,आत्म विश्वास घट्ने छैन । कुरा भन्दा काममा जोड दिनुहोला । सरल विधिबाट कार्य सम्पादन हुनेछन् । व्यापार व्यवसायबाट स्वल्प लाभ हुनेछ । राजनैतिक भरोसामा मात्रै काम नगर्नु होला । आफन्तबाट होइन टाढाका व्यक्तिबाट सहयोग मिल्नेछ । आयको केहि हिस्सा मनोरञ्जनमा खर्च हुनेछ । उधारोमा काम नगर्नु होला ।

कर्कटः–हेलचक्र्याई नगरि काम गर्नु होला । लगनशिल भई गरेका धेरै जसो काम सफल हुनेछन् । अरुको भरमा मात्रै काम नगर्नु होला आएको अवसर पनि फुत्किन सक्छ । राजनैति हतियार प्रयोग गरेर काम गर्न सके केहि उपलब्धि हात लाग्नेछ । साँझेदारी काममा हात नहाल्नु होला । पढाई लेखाई प्रगति हुनेछ । यात्राको योग टरेको छैन ।

सिंहः– शरीरमा रोग व्याधिको प्रकोप बढ्नेछ । दैनिक काम काजमा अवरोध आउनेछ । नयाँ क्षेत्रमा लगानी नबढाउनु होला डुब्न सक्छ । अरुको आशा र भरोसामा बस्दा अवसर गुम्नेछ । गलत विचार बढ्नेछ । जोखिम मोलेर काम नगर्नु होला । व्यापार व्यवसायमा गिरावट आउनेछ । आर्थिक पक्ष कमजोर बन्नेछ । इज्जत प्रतिष्ठामा आच आउनेछ ।

कन्याः–समयको सदुपयोग गर्नु होला । काममा ढिला सुस्ति गर्दा अवसर गुम्न सक्छ । तर आज गरेका अधिकाँश काम सफल हुनेछन् । व्यापार व्यवसायबाट आय आर्जन राम्रै हुनेछ । आफन्तको सहयोग सहानुभूति मिल्नेछ । हेलचक्र्याई नगरि काम गर्नु होला । विदेश यात्राको सम्भावना अझै देखिन्छ । दामपत्य जीवनमा सुखानुभूति हुनेछ ।

तुलाः– प्रतिश्पर्धात्मक काममा सफलता मिल्नेछ । पुराना समस्या समाधान हुनेछन् । आफ्ना काम सफल गर्न पनि बढि मेहनतको आवस्यकता पर्नेछ । परिश्रमको फल मिठो पाईनेछ । अरुको भर धेरै नपर्नू होला । खेलाडीको लागि दिन बढि अनुकुल देखिन्छ । नयाँ कामको बारेमा विचार विमर्श हुनेछ । नोकरीबाट त्यति सन्तुष्टि मिल्ने छैन ।

वृश्चिकः– आफुमा भएको उर्जाको प्रयोग गर्नु होला । मेहनतपूर्वक गरेका काम सफल हुनेछन् । कर्म प्राप्तिको चिन्ताले छाड्ने छैन । व्यापार व्यवसायबाट अल्प लाभ हुनेछ । पढाई लेखाईमा सामान्य प्रगति हुनेछ । यान्त्रिक काममा अभिरुची बढ्नेछ । अरुको भर विश्वासमा मात्रै काम नगर्नु होला विचमा धोका हुनसक्छ । अर्थ अभावको महशुस हुनेछ ।

धनुः–अर्थ अभावका कारण योजना कार्यन्वयनमा ढिला सुस्ति हुनेछ । संचित धन नोक्सान हुनसक्छ । धन दिएर कसैलाई आफ्नो बनाउन सकिने छैन । इज्जत प्रतिष्ठामा आच आउन सक्छ सतर्क भएर काम गर्नु होला । आलस्यता नै शत्रु सम्झनु होला । व्यापार व्यवसायबाट उचित लाभ लिन सकिने छैन । धन माल हराउन सक्छ ।

मकरः– रिस,अहंकार र क्रोधलाई नियन्त्रण गरेर काम गर्नु होला,गरेका कामबाट दाम मात्र होईन प्रशंसा पनि पाईनेछ । व्यापार व्यवसायबाट आय आर्जन राम्रै हुनेछ । घर परिवारबाट सहयोग सहानुभूति मिल्ला । गलत विचार त्यग्नु होला । समयमा काम गर्ने प्रयत्न गर्नु होला,ढिला सुस्ति गर्दा अवसर फुत्किने सम्भावना रहनेछ ।

कुम्भः–समय सुधारोन्मुख छ । लगनशिल भई काम गर्नु भयो भने आफ्नो मिशनमा पुग्न सक्नु हुनेछ । अरुको कुरामा धेरै नलाग्नु होला । धन आफन्त मान्छे भए नदिदा राम्रो हुनेछ । हेलचक्र्याई गरेर काम नगर्नु होला वचे खुचेको पनि सकिनेछ । नोकरीबाट सन्तुष्टि मिल्ने छैन । निर्माण व्यवसायबाट भने सामान्य लाभ हुनेछ ।

मिनः– समग्रमा दिन अनुकुल जस्तै देखिन्छ । परिश्रमपूर्व गरेका काम सफल हुनेछन् । दामपत्य जीवन सामान्य सुख भेटिने छ । पूर्व तयारीका साथ काममा लाग्नु होला उपलब्धि राम्रै हात लाग्नेछ । सामाजिक क्षेत्रमा सफलता मिल्नेछ । पराक्रम घट्ने छैन । व्यापार व्यवसायबाट आय आर्जन सन्तोषजनक नै होला । घर डेराको समस्या पर्न सक्छ ।

(राशिफलमा जे जस्तो भए पनि सवैको दिन सुखमय रहोस् । ईश्वर दाहिना हुन । भगवानले रक्षा गरुन । ॐ शान्ति ! ॐ शान्ति ! ! ॐ शान्ति ! ! ! श्रीकुृष्णार्पणास्तु )। नोटः–यो राशि,पञ्चाङ्ग आदि नेपालको राजधानी काठमाडौंलाई आधार मानेर तयार गरिएको हो –पंडित श्रीकण्ठ सुराचार्य ।

Comment