पर्यटन प्रवद्र्धन गर्न पश्चिम नवलपरासीको बर्दघाटमा सडक खाना महोत्सव



परासी, २ फागुन  :पर्यटन प्रवद्र्धन गर्ने उद्देश्यले पश्चिम नवलपरासीको बर्दघाटमा सञ्चालन गरिएको प्रथम सडक खाना महोत्सवमा आन्तरिक पर्यटकको घुइँचो लागेको छ । महोत्सवमा विभिन्न जातीय मौलिक खानाका परिकारका कक्ष राखिएको छ ।महोत्सवस्थलमा राखिएका विभिन्न परिकारका खानाका स्वाद लिन साँझपख पर्यटकको घुइँचो लागेको हो । नेपाल भ्रमण वर्ष २०२० लाई सफल पार्न होटल तथा रेष्टुरेण्ट व्यवसायी सङ्घ र मदिरा व्यवसायी सङ्घले यही फागुन १ गतेदेखि जिल्लामै पहिलोपटक सडक खाना महोत्सवको आयोजना गरेका हुन् ।

आन्तरिक पर्यटन प्रवद्र्धन गर्दै सरकारले घोषणा गरेको भ्रमण वर्ष सफल पार्न महोत्सव आयोजना गरिएको होटल तथा रेष्टुरेण्ट व्यवसायी सङ्घका जिल्ला अध्यक्ष नुमराज अधिकारीले बताउनुभयो ।विभिन्न परिकारका खानाका स्वाद लिन र राष्ट्रिय तथा स्थानीय कलाकारको साथमा रमाउन पनि आन्तरिक पर्यटकको घुइँचो लागेको बताउँदै उहाँले भन्नुभयो, “नेपाल सरकारले घोषणा गरेको भ्रमण वर्ष सफल पार्नु हाम्रो दायित्व हो, महोत्सवले पश्चिम नवलपरासीलाई पर्यटकीय जिल्लाका रुपमा प्रवद्र्धन गर्नेछ, यस क्षेत्रका धार्मिक, प्राचीन तथा पर्यटकीयस्थलको प्रचारप्रसार गर्ने, स्थानीय खानाका परिकार प्रवद्र्धन गर्ने, स्थानीयस्तरमा उत्पादित वस्तुको प्रवद्र्धन गर्ने तथा वस्तु तथा सेवा व्यापारको विस्तार गर्दै रोजगारी, राजश्व र उद्यमशीलताको विकास गर्ने हाम्रो उद्देश्य हो ।”

दिउँसो ४ः०० बजेदेखि राति १० बजेसम्म महोत्सवमा भीड लाग्ने गरेको छ । एकै ठाउँमा विभिन्न थरिका परिकारका स्वाद लिन पाउँदा छुट्टै खालको रमाइलो महसुस भएको पर्यटकले बताएका छन् । अन्य समयमा साँझपख सुनसान हुने बर्दघाटको हाटबजार लाइनमा अहिले साँझपख विशेष रमझम देखिएको छ । आन्तरिक तथा बाह्य पर्यटक आकर्षण गर्न एवं स्थानीय मौलिक खाद्यवस्तुको प्रवद्र्धन हुने अपेक्षा राखिएको महोत्सवको एक लाख दर्शकले अवलोकन गर्ने र रु दुई करोडको आर्थिक कारोवार हुने अनुमान गरिएको मदिरा व्यवसायी सङ्घका जिल्ला अध्यक्ष मुक्ति श्रेष्ठले बताउनुभयो ।

उहाँले भन्नुभयो, “आन्तरिक एवं बाह्य पर्यटन प्रवद्र्धनका लागि महोत्सवमा परम्परागत मौलिक, जातिगत खाद्य परिकारका स्टल, स्थानीय स्रोतमा आधारित दूधजन्य खाद्यपदार्थ, मासुजन्य एवं औषधिजन्य परिकारका स्टलका साथै राष्ट्रिय एवं अन्तरराष्ट्रियस्तरमा प्रचलित परिकार प्रदर्शन गरिएको छ ।” परम्परागत संस्कृति झल्कने एवं वेषभूषाको प्रदर्शन, स्थानीय जाति विशेषका खानाका परिकार, स्थानीय खाद्य सामग्रीको प्रदर्शनी तथा प्रवद्र्धन, स्थानीय एवं राष्ट्रिय कलाकारको प्रस्तुतिले आन्तरिक पर्यटकको आकर्षण बढेको आयोजकको दाबी छ ।(रासस)

Comment