काठमाडौं – युईएफए च्याम्पियन्स लिगका शीर्ष टोली चेल्सी, म्यानचेस्टर युनाइटेड र युभेन्ट्सले जित हात पारेका छन् । बुधबार रातिका खेलमा इंग्लिस क्लब चेल्सी, म्यानचेस्टर युनाइटेड र इटाली सिरि ए क्लब युभेन्टसले जित निकालेका हुन् ।
घरेलु मैदानमा चेल्सीले माल्मो एफ एफविरुद्ध ४-० गोल अन्तरको सहज जित पार्याे । चेन्सीको जितमा जर्जिन्होले २ गोल गर्दा आन्ड्रेयश क्रिष्टेन्सेन र काई हाभार्टले १/१ गोल थपे ।
समूह ‘एच’कै अर्को खेलमा युभेन्टसले रसियन क्लब जेनिट सेट पिटर्सवर्गमाथि १-० को कठिन जित निकाल्यो । भ्रमणमा रहेकाे युभेन्टसको जितमा डेजान कुलुसेभ्सकीले खेलको ८६ मिनेटमा निर्णायक गोल गरे ।
जितपछि समूह ‘एच’मा ३ खेलमा शतप्रतिशत जितसहित युभेन्टस शीर्ष स्थानमा छ । ३ खेलबाट ६ अंक बनाएको चेल्सी दोस्रो तथा ३ अंक बनाएको जेनिट तेस्रो स्थानमा रहँदा माल्मो अन्तिम स्थानमा छ ।
बुधबार राति नै भएको समूह ‘एफ’को खेलमा क्रिष्टियानो रोनाल्डो प्रेरित म्यानचेस्टर युनाइ्डले इटाली सिरि ए क्लब एटालान्टालाई रोमाञ्चक खेलमा ३-२ गोल अन्तरले पराजित गर्याे ।
घरेलु मैदानमा युनाइटेडलाई जिताउन मार्कुस रस्फोर्ड, ह्यारी म्यागुइर र रोनाल्डोले १/१ गोल गरे । पराजित एटालान्टाको लागि मारिओ पासालिक र मारिह डेमिरलले १/१ गोल गरे ।
सुरुवाती २८ मिनेटमा २-० को अग्रता जोगाउन नसक्दा एटालान्टा शीर्ष स्थानमा उक्लने मौका गुमाएकाे हाे । समूह ‘एफ’को अर्को खेलमा स्पेनिस क्लब भिल्लारियलले स्वीस क्लब योङ ब्वाइलाई ४-१ गोल अन्तरले पराजित गरेकाे छ ।
जितसँगै युनाइटेड समूह ‘एफ’को शीर्ष स्थानमा पुगेको छ । युनाइटेडको ३ खेलबाट ६ अंक छ । ३ खेलबाट ४ अंक भए पनि एटालान्टा दोस्रो र भिल्लारियल तेस्रो स्थानमा छ । योङ ब्वाई भने ३ अंकसहित तालिकाकाे पुछारमा छ ।
