२० असार, काठमाडौंः काठमाडौंका विभिन्न चार ठाउँका ढलको पानीमा कोरोना भाइरस भेटिएको छ ।

एक अध्ययानका अनुसार काठमाडौंका विभिन्न चार ठाउँका ढलमा कोरोना भाइरसको भेटिएको एक अध्ययनले जनाएको छ । उक्र अध्ययनका अनुसार काठमाडौंको ढलको पानीमा कोरोना भाइरस रहेको देखिएको छ । विगत दुई महिनादेखि सार्स २ इन्भारोमेन्टल सर्भिलेन्सले गरेको अध्ययनमा यो देखिएको छ।

अनुसन्धानका मूख्य अनुसन्धानकर्ता डा. दिवेश कर्माचार्यले पछिल्लो १४ दिनमा ढलबाट लिईएको नमुनामा दुई ठाउँमा कोरोना भाइरसको अस्तित्व पाइएको छ । उनले भने, ‘हामीले कम्तिमा १०० घरको शौचालयको ढल एकै स्थानमा जाने मुख्य चार स्थानको ढलको नमुना लिएका थियौँ। मानिसको दिसामा समेत कोरोना भाइरस रहेकाले त्यो ढलमा देखिएको हो।’ उनले कोरोना भाइरस मानिसको शौचमा भएकाले समुदायमा फैलिएको संकेत गरिसकेको बताए ।

२० असार, काठमाडौंः कैलालीमा होम क्वारेन्टाइनमा बसेकी एक महिलाको मृत्यु भएको छ । कैलालीकोे गोदावरी नगरपालिका वडा नम्बर १० मा होम क्वारेन्टिनमा बसेकी ४८ वर्षकी एक महिलाको मृत्यु भएको हो ।

वडा नम्बर १० का अनुसार रवीन्द्र शाहीका अनुसार महिलमा हिजो राति स्वास्थ्यमा समस्या आएको थियो । हिजो राती नै उनको मृत्यु भएको शाहीले बताए ।

भारतबाट गत जेठ २६ गते नेपाल आइपुगेकी उनी आफ्नै घरमा होम क्वारेन्टाइनमा थिईन् । अध्यक्ष शाहीका अनुसार महिलामा प्यारालाइसिस र रक्तचापको समस्या थियो ।

मृत्युपछि भने उनको कोरोना परिक्षणका लागि स्वाब नमुना संकलन गरिएको छ ।

२० असार, काठमाडौंः  हिजो बझाङ जिल्लाको केदारस्युँ गाउँपालिका ८ मा पहिरो जाँदा एउटा वस्ती नै बगाएको थियो । उक्त पहिरोमा पनि बेपत्ता भएकाहरुमध्ये तीन जनाको शव भेटिएको छ ।

प्रहरीका अनुसार शव भेटिएकाहरुमा ५० वर्षीया राममती जेठारा, उनका छोरा १३ वर्षीय प्रयाग जेठारा र छोरी सात वर्षीया अस्मिता जेठारा रहेका छन् ।

नियमित परिरहेको वर्षाका कारण गाउँ माथिबाट आएको पहिरोका कारण हिजो राती केदारस्युँ गाउँपालिका ८ मल्लेसीका १७ वटा घर बगाएको थियो । प्रहरीका अनुसार पहिरोमा परि अझैं मानिस बेपत्ता रहेका छन्। उनीहरुको खोजी जारी रहेको छ ।

काठमाडौं-उत्तर कोरियाली नेता किम जङ-अनले कोभिड-१९ विरुद्ध आफ्नो देशले प्राप्त गरेको ‘सफलता’ को प्रशंसा गरेको राज्य नियन्त्रित समाचारसंस्था केसीएनएले जनाएको छ।

पार्टीको पोलिटब्यूरो बैठकमा बोल्दै किमले उत्तर कोरियाले “घातक भाइरसको प्रवाहलाई रोक्न सकेको र स्थिर अवस्था कायम गरेको” बताएका हुन्।

कोरोनाभाइरस संसारभरि फैलिरहेको बेला छ महिनाअघि उत्तर कोरियाले आफ्नो सीमा बन्द गर्दै हजारौँ मानिसलाई क्वारन्टीनमा राखेको थियो।

उत्तर कोरियाले आफ्नो देशमा कोरोनाभाइरस सङ्क्रमण नभएको दाबी गरेको छ। तर विश्लेषकहरू यो असम्भव भएको मान्छन्।

किमले बिहीवार पोलिटब्यूरो बैठकमा “महामारीविरुद्धको छ महिना लामो राष्ट्रिय सङ्कटकालीन कामको विस्तृत विश्लेषण” गरेको बताइएको छ।

उनले “पार्टीको केन्द्रीय समितिको दूरदर्शी नेतृत्वले” कोरोनाभाइरसलाई नियन्त्रण गर्न सफल भएको बताएको उल्लेख गरिएको छ।

तर उनले छिमेकी देशहरूमा भाइरस अझै रहेको बताउँदै “महामारीविरुद्धको कार्यमा आराम नगरी सतर्कता” कायम गर्नुपर्नेमा जोड दिएका छन्।

“उनले दोहोर्‍याएर अहिलेको अवस्थामा त्रुटि भएमा महामारीले अकल्पनीय र अपूरणीय सङ्कट निम्त्याउने बताए,” केसीएनएले लेखेको छ।

प्युठान- प्युठानमा चुनढुङ्गा बोकेको टिपर दुर्घटना हुँदा दुई जनाको ज्यान गएको छ।

जिल्लाको खप्रेङखोलावाट दाङको कालाकाटे स्थित शुभश्री अग्नि सिमेन्ट उद्योगमा चुनढुङ्गा बोकेर जाँदै गरेको ना ७ ख ८९३८ नम्बरको टिप्पर दुर्घटनामा परेको हो।

दुर्घटनामा सो टिपरका चालक र सहचालक दुईजनाकै घटनास्थलमै ज्यान गएको जिल्ला प्रहरी कार्यालय प्युठानका प्रहरी नायब उपरीक्षक नरेन्द्र कुमार कार्किले जानकारी दिए।

उनका अनुसार प्युठान भालुबाङ सडकखण्ड अन्तर्गत शनिबार बिहान
सरुमारानी गाउपालिका वडा नम्बर ६ मोतिपुरस्थित भीरबाट झण्डै ५ मिटर तल माडी नदिमा टिपर खसेको हो।

मुत्यु हुनेमा टिपर चालक नौबहिनी ६ पिपलटारीका ३० बर्षीया रोशन थापा र सहचालक अन्दाजी बर्ष २७ का जोग बहादुर पुन रहेको मृत्यु घटनास्थल पुगेका प्रहरी सहायक निरिक्षक थङ लामाले बताए।

घटनास्थलमा प्रहरी पुगेर उद्धारको काम गरिरहेको छ। घटना बारेमा अनुसन्धान भइरहेको प्रहरीले जनाएको छ ।

काठमाडौं- निर्णायक ठानिएको सत्तारुढ नेपाल कम्युनिष्ट पार्टी (नेकपा)को जारी स्थायी कमिटी बैठक स्थगित भएको छ।

शनिबार बिहान ११ बजेका लागि बोलाइएको बैठक २२ गतेसम्मलाई स्थगित भएको प्रधानमन्त्रीका प्रेस सल्लाहाकार सुर्य थापाले जानकारी दिए।

यसअघि आज बस्ने स्थायी कमिटी बैठकमा नेकपामा देखिएको विवादमा निर्णायक निष्कर्षमा पुग्ने नेताहरबीच समझदारी बनेको थियो।

स्थायी कमिटीकाे बैठक २२गतेसम्म स्थगित ।

— Surya Thapa (@ThapajiSurya) July 4, 2020

२० असार, काठमाडौंः विश्वभर फैलिएको कोरोना महामारीका कारण संक्रमित हुनेको संख्या १ करोड १० लाखभन्दा धेरै भएको छ । जोन हप्किन्स विश्वविद्यालयको आजको तथ्यांकका अनुसार अहिले विश्वभर कोरोना संक्रमणको पुष्टि हुनेको संख्या १ करोड १० लाख ४५ हजार ५ सय ९ पुगेको छ ।

त्यस्तै, विश्वभर कोरोना भाइरसको कारण ज्यान गुमाउनेको संख्या पनि ५ लाख २४ हजारभन्दा माथि भएको छ । विश्वविद्यालयको तथ्यांक अनुसार हालसम्म कोरोना संक्रमणका कारण मृत्यु हुनेको संख्या ५ लाख २४ हजार ५ सय ७७ रहेको छ ।

विश्वभरका विभिन्न देशहरुमध्ये कोरोना भाइरस संक्रमणबाट सबैभन्दा धेरै प्रभावित अमेरिकामा २७ लाख ९३ हजार ४ सय ३५ जनामा कोरोनापुष्टि भएको छ भने हालसम्म कुल १ लाख २९ हजार ४ सय ३० जनाको मृत्यु भएको छ । त्यस्तै, दोस्रो अति प्रभावित देश ब्राजीलमा हालसम्म १५ लाख ३९ हजार ८१ जनामा कोरोना संक्रमणको पुष्टि भएको छ भने हालसम्म ब्राजीलमा कुल ६१ हजार ८ सय ८४ जनाको कोरोना भाइरसको कारण मृत्यु भएको तथ्यांक छ ।

२० असार, काठमाडौंः नेपालमा थप एक जना कोरोना संक्रमितको मृत्यु भएको छ ।

गोरखा अस्पतालमा उपचाररत एक जना कोरोना संक्रमितको मृत्यु भएको हो । कोरोना संक्रमणको पुष्टि भएपछि अस्पतालमा भर्ना भएका पालुङटार नगरपालिका वडा नं। ७ निवासी ४४ वर्षीय पुरुषको उपचारका क्रममा मृत्यु भएको हो ।

थप एक जनाको मृत्युसगै नेपालमा कोरोना संक्रमणका कारण मृत्यु हुनेको संख्या ३३ पुगेको छ ।

२० असार, काठमाडौंः नेपाल कम्युनिष्ट पार्टी दुइ अध्यक्ष केपी शर्मा ओली र पुष्प कमल दहाल प्रचण्ड बिच छलफल हुने भएको छ छ ।

आज बस्ने नेकपाको वैठकभन्दा अगाडी नै दुइ अध्यक्ष बिच छलफल हुने पार्टी स्रोतले जनाएको छ । स्थायीकमिटिको वैठक आज ११ बजेलाई राखिएको छ । हिजो शुक्रबारको वैठक पार्टीभित्रैबाट विभिन्न विवाद आएकाले स्थायी कमिटि वैठक स्थगित गरिएको हो ।

त्यसो त, दुई पार्टीका अध्यक्ष बिच हिजो शुक्रबार पनि ३ घण्टा लामो छलफल भएको थियो । तर, उक्त छलफल निष्कर्षविहिन टुंगिएको थियो ।

पार्टी भित्रैबाट केपी ओलीले प्रधानमन्त्री र नेकपा अध्यक्षको पद त्याग्नुपर्ने आवाज चर्को भईरहेको छ । अर्कँतिर, ओलि निकट समुहले उनी दुवै पदका लागि उपयुक्त भएको बताईरहेका छन् ।

विराटनगर, २० असार – प्रदेश नं १ मा शुक्रबार ३८ जना कोभिड–१९ सङ्क्रमित थपिएका छन् । यसरी सङ्क्रमित हुनेमा चार महिला र ३४ पुरुष रहेको सामाजिक विकास मन्त्रालयले जनाएको छ ।
मन्त्रालयका अनुसार झापामा २८, मोरङ र उदयपुरमा पाँच÷पाँच जनामा कोभिड–१९ पोजेटिभ रिपोर्ट देखिको छ ।

झापाको मेचीनगरमा १४, हल्दीबारीमा तीन, अर्जुनधारामा दुई महिलासहित आठ, विर्तामोडमा एक महिला, कनकाईमा एक महिलासहित दुई, मोरङको विराटनगरमा तीन, बेलबारी र बूढीगङ्गामा एक÷एक, उदयपुरको वेलकामा पाँच जनामा सङ्क्रमण देखिएको मन्त्रालयले जनाएको छ । योसँगै प्रदेशमा सङ्क्रमितको सङ्ख्या ६५३ पुगेको छ ।

यस्तै प्रदेशबाट शुक्रबार छ जना सङ्क्रमितको निको भई घर फर्केका छन् । घर फर्कनेमा मोरङका चार र सुनसरीका दुई जना रहेका छन् । प्रदेशमा निको हुने सङ्क्रमितको सङ्ख्या ४०६ पुगेको छ ।(रासस)

सुर्खेत, २० असार- कर्णालीमा कोरोना सङ्क्रमित हुनेको भन्दा निको भएर घर जानेको सङ्ख्यामा वृद्धि भएको छ । शुक्रबार ५१ सङ्क्रमित निको भएर घर फर्केसँगै यस प्रदेशका कूल सङ्क्रमितमध्ये ८० प्रतिशत निको भएका छन् ।

दुई महिलासहित ५१ जना घर फर्केका छन् । निको हुनेहरुमा दुल्लु अस्पताल दैलेखका ३१, प्रदेश अस्पतालका १२, सालकोट आइसोलेसन सेन्टरबाट छ र ठाँटीकाँध आइसोलेसन सेन्टर दैलेखका दुई जना रहेको कर्णाली प्रदेश सरकार सामाजिक विकास मन्त्रालय स्वास्थ्य सेवा महाशाखाका प्रमुख डा लक्ष्मीनारायण तिवारीले जानकारी दिनुभयो ।

“शुक्रबार निको हुनेसँगै कर्णालीमा कोरोना उपचार गराएर घर फर्कनेको सङ्ख्या एक हजार १७८ पुगेको छ”, महाशाखा प्रमुख डा तिवारीले भन्नुभयो, “यसले बाँकी रहेका ३०५ सङ्क्रमितको मनोवल बढेको छ ।” कर्णालीका सङ्क्रमितमा कोरोना भाइरसको सङ्क्रमण देखिए पनि अहिलेसम्म लक्षण नदेखिएको उहाँले बताउनुभयो ।

दैलेख अस्पतालमा गरिएको आरटी पिसिआर परीक्षणमा नारायण नगरपालिकाका आठ र एक डुङ्गेश्वर गाउँपालिका व्यक्तिमा कोरोना सङ्क्रमण पुष्टि भएको छ । १०५ जना स्थानीय सङ्क्रमित यससँगै कर्णालीमा हालसम्म कोरोना सङ्क्रमितको सङ्ख्या एक हजार ४८३ पुगेको छ । त्यसमध्ये १०५ जना स्थानीय सङ्क्रमित हुन् भने बाँकी सबै भारतबाट आएर क्वारेन्टिनमा बसेका हुन् ।

महाशाखाका स्वास्थ्य शिक्षा अधिकृत नवराज कँडेलका अनुसार स्थानीय सङ्क्रमितमा स्वास्थ्यकर्मी, क्वारेन्टिन र आइसोलेसनमा खटिएका सुरक्षाकर्मी र जनप्रतिनिधि रहेका छन् । अधिकृत कँडेलले भन्नुभयो, “२३ जना स्वास्थ्यकर्मी, ५३ जना सुरक्षाकर्मी, तीनजना जनप्रतिनिधि र अन्य १५ जना स्थानीयमा कोरोना सङ्क्रमण देखिएको छ, तीमध्ये धेरैजसो निको भएर फेरि काममा फर्किसकेका छन् ।” कोरोना सङ्क्रमणका कारण कर्णालीमा हालसम्म छ जनाको मृत्यु भएको महाशाखाले जनाएको छ । (रासस)

२० असार, काठमाडौंः आज नेपाली चलचित्रकी प्रतिभाशाली अभिनेत्री स्वस्तिमा खड्काको जन्मदिन रहेको छ ।

नेपाली चलचित्रकी निकै प्रतिभाशाली तथा चर्चित अभिनेत्री स्वस्तिमाको आज जन्मदिनमा उनलाई उनका श्रिमान निश्चल बस्नेतले रातको बाह्र बजे नै शुभकामना दिउका छन् । त्यस्तै, उनलाई अन्य फ्यान तथा कलाकारहरुले पनि शुभकामना दिएका छन् । उनलाई श्रिमान निश्चिल बस्नेतले शुभकामना दिदैं लेखेका छन्, ‘ह्याप्पी बर्थडे बुढी ।’

स्वस्तिमा आजकै दिन विसं २०५२ मा जन्मिएकी थिईन् । उनले होस्टल रिर्टन्स मार्फत नेपाली सिनेमामा प्रवेश गरेर पछिल्ला समयमा छक्का पञ्जा २, नाई नभन्नु ल ५, लभ लभ लभ लगायतका चलचित्रमा अभिनय गरेकी छिन् । साथै, पछिल्लो समयमा नेपाली सिनेमामा निकै राम्रो बनेको चलचित्र बुलबुलमा समेल स्वस्तिमा खड्काकै अभिनय रहेको छ ।

काठमाण्डौं–अबदेखि क्यान्सर र मधुमेहका बिरामीको पनि कोरोना परीक्षण हुने भएको छ ।

सरकारले क्यान्सर, मधुमेह र आइसियूमा रहेका बिरामीको कोरोना परीक्षण गर्ने भएको छ।

स्वास्थ्य मन्त्रालयका प्रवक्ता डा. जागेश्वर गौतमले शुक्रबारको नियमित प्रेस ब्रिफिङमा परीक्षणको दायरा फराकिलो बनाइएको भन्दै यस्ता रोगीहरूको कोरोना परीक्षण गरिने जानकारी गराए।

यस्तै अस्पतालको आकस्मिक कक्षमा भर्ना भएका बिरामीहरूको पनि परीक्षण हुने भएको छ। साथै अस्पतालहरुका स्वास्थ्यकर्मीको पनि परीक्षण गर्ने मन्त्रालयको तयारी छ।

पछिल्लो समय स्वास्थ्यकर्मीहरुमा पनि संक्रमण देखिन थालेपछि सरकारले अस्पतालहरूमा परीक्षण केन्द्रित गर्ने तयारी गरेको हो।

प्रवक्ता गौतमले अब निजी अस्पतालहरूले पनि कोरोना संक्रमितको उपचार गर्ने जनाए।

मन्त्रालयले क्लीनिकल समन्वय समितिको छलफलबाट सरकारी, सामुदायिक तथा निजी अस्पतालमा बिरामीको उपचार गर्ने व्यवस्था मिलाइएको जनाएको छ ।

काठमाडौँ, १९ असार – राष्ट्रिय गौरवको आयोजनाका रुपमा रहेको भैरहवास्थित गौतमबुद्ध अन्तर्राष्ट्रिय विमानस्थल आगामी डिसेम्बर महिनाभित्र निर्माण सम्पन्न भई सञ्चालन हुने भएको छ । पर्यटनमन्त्री भट्टराईले गौतमबुद्ध विमानस्थल भिसेम्बरमा सञ्चालनमा आउने र व्यावसायिक उडानका लागि त्यसको तीन महिनाभित्र सबै कार्य सकिने तयारी रहेको जानकारी दिनुभयो ।

हाल यो विमानस्थलको भौतिक प्रगति ९१ प्रतिशत रहेको छ । बन्दाबन्दीको अवधिमा तीन प्रतिशत भौतिक प्रगति भएको थियो । विमानस्थलको टर्मिनलमा प्राविधिक तथा यान्त्रिक उपकरण आउने क्रम शुरु भएको छ । विमानस्थल निर्माणमा २९ चिनियाँसहित २७५ कामदार निरन्तर परिचालन गरिएका मन्त्रालयले जनाएको छ । कतिपय प्राविधिक चीन, जापान, युरोपलगायत मुलुकबाट आउनुपर्ने भएकाले विमानस्थलको केही प्राविधिक काम विलम्ब भएको पनि मन्त्रालयले जनाएको छ ।

पोखरा क्षेत्रीय अन्तर्राष्ट्रिय विमानस्थलको काम पनि बन्दाबन्दीमा निरन्तर भएको छ । यस अवधिमा नौ प्रतिशत भौतिक प्रगति भई जम्मा ५९ प्रतिशत प्रगति भएको विमानस्थल आयोजनाले जनाएको छ । बजेटबाट पर्यटन क्षेत्रको पुनरुत्थानको कार्यक्रम र दिगो पर्यटन विकासका अवधारणामा काम गर्न रु २० करोडको बजेट व्यवस्था गरिएको छ । होटल रेस्टुरा तथा पर्यटन क्षेत्रका विभिन्न निकायमा व्यवसाय सुचारु गर्दा अपनाउने स्वास्थ्य सुरक्षा प्रोटोकल जारी गरिएको मन्त्रालयले जनाएको छ ।(रासस)

वीरेन्द्रनगर, १९ असार- र्खेतमा प्रधानमन्त्री केपी शर्मा ओलीको समर्थनमा प्रर्दशन भएको छ । सत्तारुढ दल नेकपाभित्र अन्तरद्वन्द्वका बीच प्रधानमन्त्री ओलीको समर्थनमा युवाहरुले प्रदर्शन गरेका हुन् । वीरेन्द्रनगरस्थित मङ्गलगढी चोकबाट शुरु गरिएको प्रदर्शन बजार परिक्रमा गरेको थियो ।

प्रर्दशनमा ठूलो सङ्ख्यामा युवाहरुको सहभागिता रहेको थियो । पार्टीभित्र ओलीलाई प्रधानमन्त्री र अध्यक्ष दुवै पदबाट राजीनामा दिनुपर्ने माग स्थायी समितिमा उठिरहेका बेला उहाँको समर्थनमा युवा तथा विद्यार्थीहरुले प्रदर्शन गरेका हुन् । उनीहरुले दुवै पदबाट ओलीलाई हटाउन नहुने भन्दै प्रदर्शन गरेका थिए ।

प्रदर्शनमा सहभागीले सरकार ढाल्न पाइँदैन, आज होइन भोलिलाई, हाम्रो समर्थन ओलीलाई भन्दै नाराबाजी गरेका थिए । प्रदर्शनमा सहभागी अनेरास्ववियुका केन्द्रीय सदस्य प्रेम खड्काले राष्ट्रघाती शक्ति लागेको भन्दै राष्ट्रवादी शक्तिलाई बचाउन नसकिए देश नरहने बताउनुभयो । अनेरास्ववियु जिल्ला संयोजक भुपेन्द्र शाहीले देश कोरोना महामारीको सङ्क्रमणविरुद्ध लडिरहेको अवस्थामा सरकारलाई सहयोग गर्नुपर्ने बताउनुभयो । (रासस )

काठमाडौँ, १९ असार – सरकारले कोरोना भाइरस (कोभिड १९)को परीक्षण दायरा बढाउने भएको छ । स्वास्थ्य तथा जनसङ्ख्या मन्त्रालयका प्रवत्ता डा जागेश्वर गौतमले परीक्षणको दायरा बढाउन क्यान्सर, मधुमेह, सघन उपचार कक्ष (आईसीयू) र आकस्मिक सेवामा उपचारारत सवै बिरामीको पीसीआर परीक्षण गर्न थालिएको बताउनुभयो ।

यसअघि विदेशबाट आएका, क्यारेन्टिनमा बसेका सम्भावित सङ्क्रमित, सङ्क्रमित व्यक्तिको यात्रा हेरेरमात्र परीक्षण गर्ने गरेकामा अबदेखि क्यान्सर, मधुमेह, सघन उपचार कक्ष (आईसीयू) र आकस्मिक सेवामा उपचाररत सबै बिरामीको पीसीआर परीक्षण गरिन थालिएको हो ।

यसैगरी सबै स्वास्थ्यकर्मीको समेत कोभिड–१९ को पीसीआर परीक्षण गरिने उहाँले जानकारी दिनुभयो । अहिलेसम्म देशभरका २३ प्रयोगशालाबाट दुई लाख ४२ हजार २४७ जनाको हालसम्म पीसीआर परीक्षण भएको छ । विगत २४ घण्टामा चार हजार ४८३ जनाको कोभिड–१९ पीसीआर परीक्षण गरिएको छ ।  प्रवक्ता डा गौतमले क्लिनिकल समन्वय समितिको निर्णयअनुसार अबदेखि सरकारीसँगै सामुदायिक र निजी अस्पतालमा पनि कोभिड–१९ को उपचार गरिने बताउनुभयो ।(रासस)

काठमाडौं- भारतीय प्रधानमन्त्री नरेन्द्र मोदी ‘सरप्राइज’ दिनमाा माहिर मानिन्छन्। नोटबन्दीको घोषणा होस् या चार घण्टाको नोटिसमा पूर्ण ‘लकडाउन’को घोषणा होस्।

शुक्रबार बिहान पनि उनी अचानक लेह पुगे, जहाँ चीन र भारतका सेनाबीच झडप हुँदा २० भारतीय सैनिकको ज्यान गएको थियो।

१५/१६ जुनको रात भारत-चीन सीमास्थित गलवान उपत्यकामा दुबै देशका सेनाबीच भएको हिंस्रक झडपमा २० भारतीय सेनाको मृत्यु भएको थियो।

उक्त घटनाको १७ दिनपछि भारतका प्रधानमन्त्री यसरी अचानक त्यस क्षेत्र मा जानुलाई ठूलो कुरा मानिन्छ।

सार्वजनिक भएका तस्बिरमा स्पष्ट देख्न सकिन्छ- प्रधानमन्त्रीलाई सैन्य अधिकारीहरु सीमा सुरक्षाबारे पुरा जानकारी दिइरहेका छन्। मोदीका साथ सेना प्रमुख जनरल नरवणे र सीडीएस बिपिन रावत पनि उपस्थित छन्।

मोदीले सैन्य जवानहरुलाई सम्बोधन गर्दै भने- ‘भारतको दुश्मले तपाईंहरुको फायर पनि देखेको छ र फ्युरी पनि ।’ चीनको नाम नै नलिइ उनले ‘विस्तारवादको युग सकिएको’ बताए।  एजेन्सी

काठमाडौँ, १९ असार – देशभर गत २४ घण्टामा थप ७४० जना सङ्क्रमित थपिएका छन् । यो सङ्ख्या अहिलेसम्मकै धेरै हो । स्वास्थ्य तथा जनसङ्ख्या मन्त्रालयद्वारा आज आयोजित नियमित पत्रकार सम्मेलनमा मन्त्रालयका प्रवक्ता डा जागेश्वर गौतमले पछिल्लो २४ घण्टामा देशभरिका विभिन्न २३ प्रयोगशालामा गरिएको परीक्षणका क्रममा ७४० जनामा सङ्क्रमण भएको जानकारी दिनुभयो ।

योसँगै सङ्क्रमितको सङ्ख्या १५ हजार २५९ पुगेको छ । प्रवक्ता डा गौतमका अनुसार अहिलेसम्म छ हजार १४३ जना उपचारपछि निको भएर घर फर्किएका छन् । पछिल्लो २४ घण्टामा ८२३ जना उपचारपछि घर फर्किएका छन् । (रासस)

काठमाडौँ, १९ असार-कोरोना भाइरस सङ्क्रमणबाट आज थप एक जनाको मृत्यु भएको छ । बानेश्वर बस्ने ८० वर्षका एक जना पुरुषको मृत्यु भएको मन्त्रालयले जानकारी दिनएको छ । मुटुको समस्या भएको उहाँको काठमाडौँको एक निजी अस्पतालमा उपचारका क्रममा मृत्यु भएको हो ।

त्यसैगरी कोभिड–१९ बाट ५०० भन्दा बढी सङ्क्रमण हुने जिल्लाहरुमा पाल्पा, सर्लाइ, रौतहट, दाङ, दैलेख, कैलाली, कपिलवस्तु महोत्तरी रहेका छन् । (रासस)

काठमाडौं- सरकारले मिलेनियम च्यालेन्ज कर्पोरेसन (एमसीसी) कार्यान्वयनको म्याद थप्न अमेरिकास्थित एमसीसी कार्यालयलाई पत्र लेखेको छ।

अर्थ मन्त्रालय स्रोतका अनुसार अर्थ सचिव शिशिरकुमार ढुंगानाले हस्ताक्षर गरी कार्यान्वयनमा जाने समय थपबारे छलफल गर्न आग्रह गरेको हो ।

कोभिड-१९ महामारीका कारण पूर्वतयारी गर्न नसकिएको भन्दै पत्रमा म्याद थप गर्नका लागि छलफलको प्रस्ताव गरिएको छ।

यसअघि मिलेनियम च्यालेञ्ज एकाउण्ट नेपाल एमसीए-नेपाल मार्फत कार्यान्वयन मितिमा पुर्नबिचार गर्न अनुरोध गरेको थियो।

एमसिए नेपालले सामेबार जारी गरेको विज्ञप्तिमा भनिएको छ, ‘हालैका दिनमा विश्वव्यापी कोभिड–१९ महामारी तथा संसदीय अनुमोदन प्रक्रियामा भएको ढिलाइका कारण कार्य प्रगतिमा अवरोध सिर्जना भएको हुँदा नेपाल कम्प्याक्ट कार्यान्वयन थालनीमा पुनर्विचार आवश्यक देखिएको छ।’

अमेरिकाले भने एमसीसीको अनुदान स्वीकार गर्ने विषय नेपालकै रोजाइको कुरा भएको तर यस अन्तर्गतको कोषको उपलब्धता भने सधैँ खुला नरहने बताएको थियो।

नेपालस्थित अमेरिकी दूतावासले सोमबार नै विज्ञप्ति जारी गर्दै
नेपालको संसदबाट एमसीसी अनुमोदन भइनसकेको बारेमा अमेरिका जानकार रहेको बताएको थियो।

‘दुई देशले सेप्टेम्बर २०१७ मा हस्ताक्षर गरेको र नेपालले सेप्टेम्बर २०१९ भित्र अनुमोदन गर्ने प्रतिबद्धता जनाएको यस ५० करोड डलरको अनुदानलाई अगाडी बढाउन आवश्यक अर्को कदम अनुमोदन हो,’ दूतावासले जारी गरेको विज्ञप्तिमा भनेको छ, ‘अनुमोदनमा ढिलाइ गर्नुको मतलब झन्डै २ करोड ३० लाख नेपालीलाई थप रोजगारी तथा आर्थिक वृद्धिमा बढोत्तरीका फाइदा दिलाउनमा ढिलाइ गर्नु हो।’

यो सम्झौताका कार्यक्रम विकास गर्न सबै प्रमुख राजनीतिक दलका प्रतिनिधित्व भएका विभिन्न सरकारहरू अन्तर्गत नेपाल सरकार र एमसीसीले सन् २०१२ देखि लगातार सँगै मिलेर काम गर्दै आएको दूतावासले स्मरण गराएको छ।

एमसीसी एक कटिबद्ध साझेदार बताउँदै दूतावासले सो कार्यक्रमले विश्वभरका झन्डै ३० देशसँग कुल १३ अर्ब बराबरको दसौँ करोडका ३७ वटा अनुदान सम्झौतामा सफलतापूर्वक साझेदारी गरिसकेको बताएको छ।

दूतावासले नेपाल राखेको कार्यान्वयन मिति पुर्नविचार गर्न आग्रह गरेको प्रस्तावप्रति भने कुनै टिप्पणी गरेको छैन्।

नेपाल सरकार र मिलेनियम च्यालेन्ज कर्पोरेशनबीच भएको सहमतिअनुसार असार १६ गते (मंगलबार) देखि एमसीसीका परियोजनाहरु कार्यान्वयनमा आउनुपर्ने हो।

तर नेपालको संसदबाट सो सम्झौता अनुमोदन हुन नसकेका कारण सो कार्यान्वयन मिति पर धकेलिने भएको छ।

सत्तारुढ दलभित्रैको चर्को विवाद भएका कारण संसदबाट एमसिसी अनुमोदन हुन नसकिरहेको छैन्।

१९ असार, काठमाडौंः बझाङका एक युवकले कोरोना संक्रमणको रिपोर्ट पोजेटिभ आएको थाहा पाएपछि आत्महत्या गरेका छन् ।

भारतबाट गत जेठ १९ गते नेपाल आएर क्वारेन्टाइनमा बसेपछि तीन दिन अघि मात्रै घर आएका युवकले आत्महत्या गरेका हुन । बझाङको खप्तडछान्ना गाउँपालिकाको वडा नम्बर ७ मा बस्ने एक १८ वर्षिय युवकले आत्महत्या गरेका हुन् । उनी आफ्नै घरमा होम आइसोलेसनमा बसिरहेका थिए ।

उनको कोरोना परिक्षणको रिपोर्ट हिजो मात्रै आएको थियो । भारतबाट नेपाल आएर बझाङकै जयपुर लामागडा प्राथमिक विद्यालयमा बनाईएको क्वारेन्टाइनमा बसेका उनी तीन दिन अघि मात्रै घर आएका थिए । हिजो आफ्नो रिपोर्ट पोजेटिभ आएको थाहा पाएपछि आत्महत्या गरेका हुन् ।

गाउँपालिकाका अध्यक्ष वर्कबहादुर रोकायाका अनुसार उनले आज विहानै आत्महत्या गरेका छन् । प्रहरीका अनुसार उनको हिजो बिहिबार कोरोना संक्रमणको रिपोर्ट आएको थियो । रिपोर्टमा आफूलाई कोरोना संक्रमण भएको पुष्टि भएसँगै उनले होमआइसोलेसनमा बसिरहेको आफ्नो घरबाट भागेर नजिकैको जंगलमा गएर आत्महत्या गरेका छन् ।

काठमाडौँ- नेपालमा कोरोना संक्रमितको संख्या ह्वात्तै बढेको छ। पछिल्लो २४ घन्टामा नेपालमा ७ सय ४० जनामा कोरोना संक्रमण पुष्टि भएको छ ।

स्वास्‍थ्य तथा जनसंख्या मन्त्रालयले शुक्रबार आयोजना गरेको नियमित मिडिया ब्रिफिङमा उक्त जानकारी दिएको हो ।

यो सँगै नेपालमा संक्रमितको संख्या १५ हजार २ सय ५९ पुगेको छ ।

मन्त्रालयका प्रवक्ता डा जागेश्वर गौतमले पछिल्लो २४ घन्टामा ४ हजार ४ सय ८३ पीसीआर परीक्षण गरिएको जानकारी दिए।

हालसम्म जम्मा २ लाख ४२ हजार २ सय ४७ पीसीआर परीक्षण भएको छ।

१९ असार, काठमाडौंः नेपालमा कोरोना परिक्षणको दायरा बढाईएको छ । स्वास्थ्य तथा जनसंख्या मन्त्रालयले कोरोना परिक्षणको दायरालाई झन फराकिलो बनाईएको जानकारी दिएको हो ।

स्वास्थ्य तथा जनसंख्या मन्त्रालयको नियमित पत्रकार सम्मेलम प्रवक्ता डा. जागेश्वर गौतमले नेपालमा कोरोना परिक्षणलाई थप फराकिलो बनाईएको बताएका हुन् । उनका अनुसार अबदेखि क्यान्सर तथा मधुमेहका बिरामीको पनि कोरोना परिक्षण हुने छ ।
मन्त्रालयले दिएको जानकारी अनुसार आजबाट आपतकालीन र आईसीयूमा बसेका बिरामी तथा पकेट क्षेत्रमा बसोबास गर्ने मानिसको पनि परिक्षण गरिनेछ । त्यस्तै, कोरोना संक्रमणको नियन्त्रण, रोकथाम तथा निदानका लागि अग्रपंत्तीमा खटिएका स्वास्थ्यकर्मीको पनि कोरोना परिक्षण गरिने मन्त्रालयले बताएको छ ।

त्यस्तै, मन्त्रालयका प्रवक्ता गौतमले बताए अनुसार क्लिनिकल समन्वय समितिको बैठकले सरकारी, सामुदायिक तथा निजी अस्पतालमा उपचार गर्ने व्यवस्था समेत मिलाईएको छ ।

१९ असार, काठमाडौंः नेपालमा कोरोना संक्रमणका कारण थप एक जनाको मृत्यु भएको पुष्टि भएको छ ।

स्वास्थ्य तथा जनसंख्या मन्त्रालयको नियमित पत्रकार सम्मेलनमा प्रवक्ता डा. जागेश्वर गौतमले नेपालमा थप एक जनाको कोरोना भाइरसको संक्रमणका कारण मृत्यु भएको पुष्टि गरेका छन् ।

मन्त्रालयका अनुसार मृत्यु हुने ८५ वर्षका बृद्ध रहेका छन् । काठमाडौंको नयाँ बानेश्वर बस्ने ८५ वर्षिया बृद्ध छाती दुखेपछि काठमाडौंको एक निजी अस्पतालमा भर्ना भएका थिए । असार १७ गते उपचारको क्रममा उनको मृत्यु भएको थियो । मृत्यु पछि उनको स्वाब परिक्षण गर्दा कोरोना संक्रमण भएको पुष्टि भएको मन्त्रालयले जनाएको छ ।

मन्त्रालयका प्रवक्ता गौतमका अनुसार मृत्यु भएका वृद्ध उच्च रक्तचाप र पार्किन्स रोगबाट ग्रसित थिए।