रोम, २ साउन – नेदरल्यान्ड्सका डिफेन्डर म्याथिस डी लीट इटालीको च्याम्पियन युभेन्टस फुटबल क्लबमा अनुबन्धित भएका छन् । क्लबका अनुसार आठ करोड ४२ लाख डलरमा उनी आयाक्सबाट युभेन्टसमा स्थानान्तरित हुन राजी भएका हुन् ।उन्नाइस वर्षीय यी प्रतिभाशाली डच खेलाडीको करार अवधि पाँच वर्षको रहेको छ ।

युभेन्टसले जारी गरेको विज्ञप्तिमा डी लीटले करार रकमका अतिरिक्त थप एक करोड ५ लाख युरो पनि पाउने उल्लेख छ ।डी लीटको सम्झौता रकम युभेन्टसको इतिहासमा तेस्रो सर्वाधिक बढी रकम हो । सन् २०१८ मा क्लबले क्रिस्टियानो रोनाल्डोका लागि १० करोड ५० लाख युरो भुक्तानीमा सम्झौता गरेको थियो भने सन् २०१६ मा गोन्जालो हिगुइनका लागि नौ करोड युरो भुक्तानी गर्न सहमति जनाएको थियो ।

डी लीटले आयाक्सका लागि ११७ खेल खेलेर १३ गोल गरेका छन् । यस सिजनको च्याम्पियन्स लिगको क्वाटर फाइनलमा आयाक्ससँग युभेन्टस पराजित हुँदा डी लीटले नै गोल गरेका थिए । डी लीटले नेदरल्यान्ड्सका लागि राष्ट्रिय टोलीबाट १७ खेल खेलिसकेका छन् । उनी आयाक्सको कप्तान समेत भइसकेका छन् ।युभेन्टसका विश्वप्रसिद्ध खेलाडी रोनाल्डोले डी लीटलाई युभेन्टसमा अनुबन्धित हुन अनुरोध गरेका थिए ।(रासस(एएफपी)

भक्तपुर, २५ असार -भक्तपुर जिल्ला बुद्धिचाल सङ्घको पाँचौं जिल्ला अधिवेशनले नीरञ्जन प्रजापतिको अध्यक्षतामा नयाँ कार्यसमिति चयन गरेको छ । अधिवेशनले उपाध्यक्षमा पूर्णसुन्दर श्रेष्ठ, सचिवमा शिवसुन्दर श्रेष्ठ, कोषाध्यक्षमा बद्री केदार दुवाल, सदस्यमा प्रवीस प्रजापति, विक्रम चोकामी, नातीभक्त दुमरु, सविना श्रेष्ठ र सविना गुजलाई चयन गरेको छ ।आगामी चार वर्षका लागि चयन भएको कार्यसमिति निर्वाचन कमिटीका अध्यक्ष एवं सङ्घका केन्द्रीय उपाध्यक्ष ज्ञानेन्द्र खाइजूले जानकारी दिनुभयो । (रासस)

काठमाडौँ, २४ असार -एसिसी इस्टर्न रिजन क्रिकेट प्रतियोगिताको उपाधिको लागि हङकङले नेपाललाई ९६ रनको सामान्य लक्ष्य दिएको छ । मलेसियाको क्वालालम्पुरस्थित किनरारा ओभल क्रिकेटमा मैदानमा आज भएको फाइनल खेलमा टस हारेर पहिले ब्याटिङ गरेको हङकङले ४३ दशमलव १ ओभरमा सबै विकेट गुमाउँदै ९५ रनमा समेटियो । हङकङका आठ ब्याट्सम्यानले दोहोरो अङ्कमा रन जोड्न सकेनन् ।

खराब शुरुआत गरेको हङकङले रनको खाता नै नखोली दुई विकेट गुमाएको थियो । आदित गोरावाराले २४ तथा काल्हन चल्लुले १९ रन जोड्दै हङकङको इनिङ्स उकासेका थिए । यस्तै रौनक कपुरले १२ रन जोडे । हङकङलाई सस्तैमा समेट्न क्रममा नेपालका सागर ढकाल एक्लैले पाँच विकेट लिए भने कमल सिंह ऐरीले तीन तथा कुशल मल्ल र तिलकराज भण्डारीले एक एक विकेट झारे ।

यसअघि भएको सेमिफाइनल खेलमा नेपालले मलेसियालाई सात विकेटले पराजित गर्दै फाइनलमा पुगेको थियो भने हङकङले सिङ्गापुरलाई डिएल पद्धतिको आधारमा ५१ रनले पराजित गर्दै फाइनलमा स्थान बनाएको हो । उक्त प्रतियोगिताको उपाधि विजेता टोली यु–१९ एशिया कपमा छनोट हुनेछन् । एशिया कपमा टेष्ट राष्ट्र भारत, पाकिस्तान, श्रीलङ्का, बाङ्गलादेश र अफगानिस्तानले प्रतिस्पर्धा गर्नेछन् । नेपाल अहिले जवाफी ब्याटिङमा उत्रेको छ । (रासस)

काठमाडौँ, १८ असार-  एसिसी यू–१९ इस्टर्न रिजन क्रिकेटमा नेपालले चीनलाई पराजित गर्दै प्रतियोगितामा उत्कृष्ट शुरुआत गरेको छ । मलेसियाको क्वालालम्पुरस्थित किनरा ओभल क्रिकेट मैदानमा आज भएको समूह चरणको आफ्नो पहिलो खेलमा नेपालले चीनलाई १० विकेटले पराजित गर्दै प्रतियोगितामा उत्कृष्ट शुरुआत गरेको हो ।

टस हारेर पहिले ब्याटिङको निम्तो पाएको चीनले नेपाललाई ५४ रनको सामान्य लक्ष्य दिएको थियो । ५४ रनको विजयी लक्ष्य बोकेर मैदान उत्रेको नेपालले पाँच ओभरमा कुनै पनि विकेट नगुमाई पूरा ग¥यो ।नेपालको लागि पवन सर्राफ सर्वाधिक ४६ रनको योगदान दिए । उनले २१ बलमा तीन छक्का र छ चौकाको मद्दतमा ४६ रन बनाएका हुन ।

त्यस्तै रित गौतमले अविजित १० रन जोडे । जीतसँगै नेपाल एक खेल अगावै सेमिफाइनलमा प्रवेश गरेको छ ।पराजित चीन भने प्रतियोगिताबाट बाहिरिएको छ । समूह चरणमा दुई खेल खेलेको चीन दुवै खेलमा पराजित भएपछि प्रतियोगिताबाट बाहिरिएको हो । पहिलो खेलमा चीन सिङ्गापुरसँग पराजित भएको थियो । त्यसअघि पहिले ब्याटिङ गरेको चीनले २३ दशमलव १ ओभरमा सबै विकेट गुमाउँदै ५३ रनमा समेटिएको थियो ।

चीनका लागि लियाङ चेन र गुओहाओले समान १३÷१३ रन जोड्नुबाहेक अन्यले दोहोरो अङ्क बटुल्न सकेनन् ।बलिङतर्फ नेपालका सागर ढकाल एक्लैले ६ विकेट लिँदा तिलक भण्डारीले तीन तथा कमल सिंह ऐरीले एक विकेट झारे । नेपालले समूह चरणको अन्तिममा सिङ्गापुरसँग खेल्ने कार्यक्रम छ । उक्त खेल यही असार २० गते हुनेछ ।(रासस)

काठमाडौँ, १६ असार – सशस्त्र प्रहरी बलको एपीएफ क्लबले थ्री स्टार क्लबलाई पराजित गर्दै ललित स्मृति कप यु–१८ च्याम्पियनसिप फुटबल प्रतियोगितामा सुखद शुरुआत गरेको छ । सातदोबाटोस्थित अखिल नेपाल फुटबल सङ्घको खेल मैदानमा आज भएको खेलमा एपीएफले थ्री स्टार क्लबलाई ५–२ गोलअन्तरले पराजित गर्दै प्रतियोगितामा सुखद शुरुवात गरेको हो । एपीएफको जीतमा रन्जन पुनले दुई गोल गरे ।

उनले खेलको २४ र ७३औँ मिनेटमा गोल गरे । त्यस्तै विपिन थापामगरले खेलको २१औँ मिनेटमा गोल गर्दा रोशन प्रधानले खेलको ३३औँ मिनेटमा तथा समिरज थोकरले खेलेको ८६औँ मिनेटमा गोल गरे । जीतसँगै समूह बी मा रहेकोे एपीएफले पहिलो खेलबाट तीन अङ्क जोडेको छ । पराजित थ्री स्टारका लािग दिप्सन राउत र सुमन श्रेष्ठले एक÷एक गोल फर्काए । दिप्सनले खेलको ४४औँ मिनेटमा गोल गर्दा सुमनले खेलको ४८औँ मिनेटमा गोल गरे ।

थ्री स्टारको भने यो पहिलो हार हो । यसअघि भएको खेलमा थ्री स्टारले मनाङ मस्र्याङ्दी क्लबसँग दुई÷दुई गोलको बराबरी खेलेको थियो । दुई खेल खेलेको थ्री स्टारको एक अङ्क छ । एन्फाद्वारा आयोजित उक्त प्रतियोगिताका विजेता टोलीले रु तीन लाख तथा उपविजेताले रु एक लाख ५० हजार पाउनेछ । प्रतियोगितामा ए डिभिजनका १४ क्लबले प्रतिस्पर्धा गरिरहेका छन् ।(रासस)

काठमाडौँ, १५ असार -ललित स्मृति कप फुटबल प्रतियोगिताअन्र्तगत आज भएको खेलमा व्रिगेड ब्वाइज क्लबले सरस्वती युथ क्लबलाई पराजित गर्दै प्रतियोगितामा सुखद शुरुवात गरेको छ ।  सातदोबाटोस्थित अखिल नेपाल फुटबल सङ्घ ९एन्फा० कम्प्लेक्सको खेल मैदानमा भएको खेलमा विग्रेड ब्वाइजले सरस्वती क्लबाई ११–१ को फराकिलो गोलअन्तरले पराजित गर्दै प्रतियोगितामा सुखद शुरुवात गरेको हो ।

जीतसँगै व्रिगेड ब्वाइजले शीर्ष तीन अङ्क जोडेको छ ।  विग्रड ब्वाइजको जितमा ब्रीजेस चौधरी र रोशन रानामगरले ह्याट्रिक पूरा गरे । ब्रीजेसले खेलको १०, ३१ र ४८औँ मिनेटमा गोल गरे भने रोशनले खेलको ३०, ४७ र ८८औँ मिनेटमा गोल गर्दै ह्याट्रिक पूरा गरेका हुन ।

त्यसैगरी शिशिर लेखिले खेलेको १२ र २७औँ मिनेटमा गोल गरे भने अञ्जन मर्हजनले खेलको ७७ र दोस्रो हाफको अत्तिरिक्त समयमा गोल गरे । दीपेश गुरुङले खेलको ७०औँ मिनेटमा एक गोल थपे । यता पराजित सरस्वतीका लागि प्रदीप कार्कीले एक सानत्वना गोल फर्काएका थिए । ‘ए’ डिजिभनमा रहेका १४ क्लबले भाग लिएको उक्त प्रतियोगिताको उपाधि विजेता टोलीले रु तीन लाख पाउनेछ भने उपविजेताले रु एक लाख ५० हजार पाउनेछ ।(रासस)

काठमाडौँ, १५ असार – मलेशियामा यही असार १७ गतेदेखि आयोजना हुने एसिसी १९ वर्षमुनि (यु–१९) इस्टर्न रिजन क्रिकेट प्रतियोगितामा सहभागी हुन १४ सदस्यीय नेपाली युवा टोली आज त्यसतर्फ प्रस्थान गर्दैछन् ।कप्तान रोहितकुमार पौडेलले नेतृत्व गर्नुभएको सो टोलीमा रित गौतम, पवन सर्राफ, विशाल विक्रम केसी, भीम सार्की, कुशल मल्ल, रशिद खान, सागर ढकाल, हरिबहादुर चौहान, प्रतिष जिसी, कमलसिंह ऐरी, खडक बोहरा, तिलक भण्डारी र लोकेश बम छन् । त्यस्तै टोलीको प्रशिक्षकमा विनोद दास छन् भने व्यवस्थापकमा राजु खड्का र फिजियोमा विक्रम न्यौपाने छन् ।

प्रतियोगितामा समूह ए मा रहेको नेपालले आफ्नो पहिलो खेल यही असार १८ गते चीनसँग खेल्नेछ । नेपालको समूहमा चीन र सिङ्गापुर छन् । त्यसैगरी नेपालले आफ्नो दोस्रो तथा समूह चरणको अन्तिम खेल असार २० गते सिङ्गापुरसँग खेल्नेछ । प्रतियोगितामा यसअघि आठ टोलीले सहभागिता जनाउने भनिए तापनि प्रतियोगिता शुरु हुनु केही दिनअघिमात्रै म्यान्माले नाम फिर्ता लिएको थियो ।

समूह ए रहेको म्यान्माले नाम फिर्ता लिएपछि उक्त समूहमा तीन टोली मात्रै सहभागी भएका हुन् । अर्को समूहमा भने चार टोली छन् ।  अर्को समूहमा आयोजक मलेशियासँगै, भूटान, हङ्कङ र थाइल्याण्ड रहेका छन् । समूहको शीर्ष दुई टोलीले सेमिफाइनलका लागि स्थान बनाउने छन् । नेपाली टोली आज दिउँसो २ बजे त्यसतर्फ प्रस्थान गर्नेछ । प्रतियोगिता यही असार २५ गतेसम्म चल्नेछ । (रासस)

चेस्टर स्ट्रिट, १३ असार – इङल्यान्डमा जारी एक दिवसीय विश्वकप क्रिकेट प्रतियोगिता अन्तर्गत शुक्रबार दक्षिण अफ्रिका र श्रीलंकाबीचको खेल शुरु भएको छ । टस जिती दक्षिण अफ्रिकाले क्षेत्र रक्षण रोजेको छ ।गत साता विश्वकप जित्ने सम्भावना रहेको इङल्यान्डलाई पराजित गरेको श्रीलंकाको आजको शुरुआत भने राम्रो हुन सकेन । पहिलो बलमै प्रारम्भिक ब्याट्सम्यान एवं श्रीलंकाली कप्तान डिमुख करुनारत्ने शून्य रनमै आउट भएका छन् । विश्वकपको यस संस्करणमा फाफ डू प्लेसीको कप्तानीमा रहेको दक्षिण अफ्रिका सेमिफाइनलका लागि छनौट हुन सकेको छैन ।(रास-एएफपी)

काठमाडौँ, १२ असार – पहिलो संस्करणको उपमेयर कप अन्तर नगरपालिका महिला फुटबल प्रतियोगिताको उपाधि विराटनगर महानगरपालिकाले हात पारेको छ । हलचोकस्थित सशस्त्र प्रहरी बल (एपिएफ)को मैदानमा आज भएको फाइनल खेलमा विराटनगरले बाह्रबिसे नगरपालिकालाई पेनाल्टी सुटआउटमा ४–१ गोलअन्तरले पराजित गर्दै उपाधिमाथि कब्जा जमाएको हो । उपाधिसँगै विराटनगरले रु पाँच लाख हात पार्दा उपविजेतामा चित्त बुझाएको बाह्रबिसेले रु तीन लाख प्राप्त ग¥यो ।

खेलको निर्धारित समयसम्म १–१ गोलको बराबरीमा सकिएपछि खेल पेनाल्टी सुटआउटमा पुगेको थियो । विराटनगरकको जीतमा रेखा पौडेल, इमा राई, विद्या राना र मनमाया लिम्बूले गोल गरिन् । यता बाह्रबिसेका लागि भने रुबिना पहरीले एक गोल गरिन् । त्यसअघि खेलको निर्धारित समयसम्म १–१ गोलको समाप्ती हँुदा विराटनगरका लागि जमुना मगरले गोल गरेकी थिइन् भने बाह्रबिसेका लागि सम्झना लावतीले गोल गरेकी थिइन् ।

प्रतियोगितामा विराटनगर महानगरपालिकाकी रेखा पौडेल सर्वोकृष्ट खेलाडी घोषित भइन् । उनले उपाधिसहित ट्रफी र रु २५ हजार हात पारिन् ।त्यस्तै प्रतियोगिताको उत्कृष्ट गोलकिपर विराटनगरकी कल्पना कार्की, डिफेण्डर बाह्रबिसेकी सरिता शेर्पा, मिडफिल्डर बाह्रबिसेकी रजनी श्रेष्ठ र स्ट्राइकर बाह्रबिसेकै पार्वती घले घोषित भइन् ।

उत्कृष्ट प्रशिक्षकको उपाधि भने विराटनगरका पारस चौधरीले पाए । व्यक्तिगत विधातर्फ उत्कृष्ट हुने खेलाडी तथा प्रशिक्षकले जनही रु दश हजार प्राप्त गरे । अखिल नेपाल फुटबल सङ्घ (एन्फा)को महिला समितिद्वारा आयोजित उक्त प्रतियोगितामा विभिन्न १८ टोलीले प्रतिस्पर्धा गरेका थिए । (रासस)

काठमाडौँ, ११ असार  – एएफसी कप फुटबल प्रतियोगितामा नेपालको लिग च्याम्पियन मनाङ मस्र्याङ्दी क्लब भारतको चेन्नईयिन एफसीसँग पराजित भएको छ । सातदोबाटोस्थित एन्फा कम्प्लेक्सको खेल मैदानमा आज भएको लिग चरणको आफनो अन्तिम खेलमा मनाङ चेन्नइयिनसँग ३–२ गोलअन्तरले पराजित भएको हो । चेन्नईयिनको जितमा मोहमद राफीले दुई गोल गरे भने इला साबिया फिल्होले एक गोल थपे । राफी खेलको ५३ औँ मिनेटमा पहिलो गोल गर्दै खाता खोले । त्यस्तै खेलको ६७ औँ मिनेटमा फिल्होले एक गोल गर्दै थप्दै चेन्नईयिनको अग्रता दोब्बर बनाए ।

मनाङका आफिज ओलाडिपोले दुई गरे । उनले दुई गोल गर्दै खेललाई दुई दुई गोलको बराबरीमा ल्याए पनि हार भने टर्न सकेन । मनाङका आफिजले खेलको ७१ र ७९औँ मिनेटमा गोल गरेका थिए । तर खेलको ८८औँ मिनेटमा चेन्नईयिनका रफीले व्यक्तिगत दोस्रो गोल गर्दै आफनो टोलीको जित पक्का गरे ।

एएफसी कपबाट बाहिरिसकेको मनाङका लागि यस खेल प्रतिष्ठाको लडाइँ मात्र थियो । समूह इ मा रहेको मनाङले छ खेलबाट दुई अङ्क मात्र जोड्यो । जितसँगै चेन्नईयिनले ११ अंक जोडेको छ । उसले छ खेलमा तीन जीत, दुई बराबरी र एक हार ब्यहोरेको छ । समूहको शीर्ष स्थानमा रहने टोली दोस्रो चरणमा प्रवेश गर्नेछ ।(रासस)

भीमदत्तनगर, ११ असार –  कञ्चनपुरको भीमदत्तनगरमा जारी प्रधानमन्त्री कप महिला क्रिकेट राष्ट्रिय प्रतियोगिताको उपाधि सशस्त्र प्रहरी बलको एपिएफ क्लबले जितेको छ । आज बिहान घरेलु टोली सुदूरपश्चिम प्रदेशलाई छ विकेटले पराजित गर्दै एपिएफले सो उपाधि जितेको हो । टस जितेर फिल्डिङ रोजेको एपिएफले निर्धारित २० ओभरको खेल ७१ रनमा समेटेको थियो । बहत्तर रनको विजय लक्ष्य पाएको एपिएफले १४ ओभरमा चार विकेटको क्षतिसहित ७४ रन बनाउन सफल भयो ।

सेमिफाइनल खेल वर्षाका कारण अवरुद्ध भएपछि सुदूरपश्चिमले प्रदेश नं २ सित अङ्क बाँडेर अन्तिम चरणको खोलमा प्रवेश गरेको थियो भने एपिएफ सेमिफाइनलमा प्रदेश नं १ लाई हराउँदै समूह ‘बी’बाट अन्तिम चरणमा पुगेको थियो । प्रतियोगितामा सात प्रदेश र विभागीय एपिएफ गरी आठ टोली सहभागी थिए । वर्षाका कारण चार खेलमा असर परेको थियो । उपाधि विजेता टोलीले रु चार लाख पुरस्कार पाउनेछ भने दोस्रो हुनेले रु तीन लाख र तेस्रो हुनेले रु दुई लाख पुरस्कार पाउने आयोजकले जनाएको छ ।(रासस)

भीमदत्तनगर, १० असार  – कञ्चनपुरको भीमदत्तनगरमा जारी प्रधानमन्त्री कप महिला प्रतियोगितामा सुदूरपश्चिम प्रदेशको टोली फाइनलमा प्रवेश गरेको छ । समूह ‘ए’ को शीर्ष स्थानमा रहेको सुदूरपश्चिम प्रदेशले आज बिहानको खेल वर्षाका कारण प्रदेश नंं २ सँग प्रतिष्पर्धा नै नगरी फाइनलमा प्रवेश गरेको हो ।

“वर्षाका कारण समूह ए मा शीर्ष स्थानमा रहेको सुदूरपश्चिमको टिम फाइनल पुगेको हो ।” प्रतियोगिता प्राविधिक कमिटीका संयोजक विनय झाले भन्नुभयो, “वर्षाका कारण प्रतियोगिता अवधिभर चार वटा खेल अवरुद्ध हुनपुगे ।”मौसममा आएको सुधारका कारण आज दिउँसोपछि सशस्त्र प्रहरीको एपिएफ क्लब र प्रदेश नं १ बीच दोस्रो सेमिफाइनल प्रतियोगिता हुने संयोजक झाले जानकारी दिनुभयो ।

आइतबार र सोमबार आएको वर्षाका कारण खेल मैदानमा पानी जमेपछि प्रतियोगिता सञ्चालन गर्न नसकिएको आयोजकको भनाइ छ । आयोजक महाकाली स्पोर्ट सोसाइटीले सोमबार राति अबेरसम्म विभिन्न प्रयास गरेर खेल मैदानको पानी हटाउने काम गरे पनि आज बिहानको प्रतियोगिता हुन सकेन ।

समूह बी को दोस्रो स्थानमा रहेको प्रदेश नं २ सेमी फाइनल खेल्न नपाउँदै बाहिरियो । बुधबार बिहान हुने फाइनल प्रतियोगिताबाट उपाधि विजेता टिमले रु चार लाखसहित पुरस्कृत हुनेछ भने दोस्रो हुने टिमले रु तीन र तेस्रो हुने टिम रु दुई लाख नगदसहित पुरस्कृत हुने आयोजकले जनाएको छ ।(रासस)

काठमाडौँ, ९ असार  – राजधानीमा जारी अन्तर नगरपालिका उपमेयर कप महिला फुटबल प्रतियोगितामा विराटनगर महानगरपालिका, विदुर नगरपालिकालाई पराजित गर्दै सेमिफाइनलमा प्रवेश गरेको छ । हलचोकस्थित सशस्त्र प्रहरी बल (एपिएफ)को मैदानमा आज भएको समूह चरणको अन्तिम खेलमा विराटनगरले विदुर नगरपालिकालाई ३–२ गोल अन्तरले पराजित गर्दै सेमिफाइनलमा प्रवेश गरेको हो ।

यो खेलसँगै उक्त प्रतियोगिताको सेमिफाइनल समीकरणसमेत पूरा भएको छ । विराटनगरसँगै चौदण्डीगढी, वालिङ र बाह्रबिसे नगरपालिका सेमिफाइनलमा पुगेका छन् । विराटनगरको जितमा राष्ट्रिय टोलीका सदस्य रेखा पौडेल, इमा राई र सावित्री मगरले एक÷एक गोल गर्नुभयो । पराजित विदुरका लागि भने अनु लामा र तारा थिङले एक÷एक गोल फर्काउनुभयो । जितसँगै समूह डीबाट तीन खेल खेलेको विराटनगरले तीनै खेलमा अपराजित रहँदै शीर्ष नौ अङ्क जोडेको छ । यता पराजित विदुर नगरपालिका छ अङ्क जोड्दै प्रतियोगिताबाट बाहिरियो ।

भोलिदेखि हुने सेमिफाइनल खेलमा विराटनगरले चौदण्डीगढी नगरपालिकाको सामना गर्नेछ । यस्तै अर्को सेमिफाइनलमा वालिङ र बाह्रबिसे नगरपालिकाबीच खेल हुनेछ । अखिल नेपाल फुटबल सङ्घ (एन्फा) को महिला समितिद्धारा आयोजित उक्त प्रतियोगिताको विजेता टोलीले रु पाँच लाख तथा उपविजेताले रु तीन लाख पाउनेछ ।(रासस)

काठमाडौँ, ९ असार  – एएफसी कप फुटबल प्रतियोगिताको आफ्नो अन्तिम खेलमा नेपालको लिग च्याम्पियन मनाङ मस्र्याङ्दी क्लबले भारतको चेन्नाइसँग खेल्ने भएको छ । सातदोबाटोस्थित अखिल नेपाल फुटबल सङ्घ (एन्फा)को मैदानमा यही असार ११ गते हुने ‘होम’ खेलमा नेपाली लिग च्याम्पियन मनाङ मस्र्याङ्दी चेन्नाईविरुद्व मैदानमा उत्रनेछ । समूह चरणमा एक खेल पनि जित हात पार्न नसकेको मनाङ पहिलो जितको खोजीमा मैदान उत्रँदा चेन्नाइविरुद्ध हारको बदला लिने दाउमा रहनेछ । सोही हारको बदला मनाङले घरेलु मैैदानमा लिन चाहन्छ ।

यसअघि गत अप्रिलमा चेन्नाइसँग उसैको मैदानमा भएको अबे खेलमा मनाङ मस्र्याङ्दी २–० गोलअन्तरले पराजित भएको थियो । प्रतियोगिताबाट यसअघि नै बाहिरिसकेको मनाङको लागि भने उक्त खेल प्रतिष्ठाको लागि मात्र हुनेछ ।प्रतियोगितामा दुई अङ्क मात्र जोड्न सकेको मनाङ एएफसी कपबाट यसअघि नै बाहिरिसकेको छ । यसअघि पाँच खेल खेलेको मनाङ जितविहीन छ । मनाङले दुई खेलमा बराबरी तथा तीन खेलमा पराजय भोग्यो ।

समूह इ मा रहेको मनाङ अङ्क तालिकाको अन्तिम स्थानमा छ । त्यस्तै बङ्गलादेशको अबहानी लिमिटेड १० अङ्कका साथ शीर्ष स्थानमा छ भने आठ अङ्क जोडेको चेन्नाइ दोस्रो स्थानमा छ । त्यस्तै मिनर्वा पञ्जाब पाँच अङ्कका साथ तेस्रो स्थानमा छ । प्रतियोगितामा समूहको शीर्ष स्थानमा रहने टोली अघिल्लो चरणमा छनोट हुनेछ ।(रासस)

कास्की, ९ असार – छैठौं महिला तथा सातौँ राष्ट्रिय पुरुष बीच भलिबल प्रतियोगिताको उपाधि महिलातर्फ सशस्त्र प्रहरी बलको एपिएफ क्लब तथा पुरुषतर्फ नेपाली सेनाको त्रिभुवन आर्मी क्लबले जितेको छ । कास्की जिल्ला भलिबल सङ्घको आयोजना तथा नेपाल भलिबल सङ्घको तत्वाधानमा यही असार ५ देखि पोखरास्थित फेवाताल किनारको बीच भलिबल कोर्टमा प्रतियोगिता सञ्चालन भएको थियो ।

आजको फाइनल खेलमा महिलातर्फ सशस्त्र प्रहरीको ‘ए’ टिमका विनिता बुढाथोकी र नेविका चौधरीको जोडीले नेपाल प्रहरीको ‘ए’ टिमका नीता शाह र कोपिला उप्रेतीको जोडीलाई समान २१–१३ को सोझो सेटमा पराजित गरी उपाधि जितेको हो । त्यसैगरी पुरुषतर्फ त्रिभुवन आर्मीको ‘ए’ टिमका मानबहादुर श्रेष्ठ र दीलकुमार सुनारको जोडीले गण्डकी प्रदेशको ‘बी’ टिमका राजु विक र अनिल दर्लामीमगरको जोडीलाई २१–१६ ,१८–२१ र १८–१६ को सेटमा पराजित गरी उपाधि चुम्न सफल बन्यो ।

प्रतियोगिताको विजेता टिमले नगद रु ३० हजार ट्रफी तथा प्रमाण प्राप्त गरे भने उपविजेताले नगद रु २० हजार ट्रफी र प्रमाणपत्रमा चित्त बुझाए । त्यसैगरी पुरुषतर्फ गण्डकी प्रदेशको ‘ए’ टिमका रमेश केसी र सञ्जुविक्रम शाहको जोडी तथा महिलातर्फ नेपाल प्रहरीको ‘बी’ टिमका मनिषा चौधरी र पुष्पा चौधरीको जाडीले तेस्रो स्थान हासिल गरी दुवै टिमले नगद रु १० हजार, ट्रफी तथा प्रमाणपत्र प्राप्त गरे ।

प्रतियोगिताको उत्कृष्ट खेलाडीको उपाधि पुरुषतर्फ त्रिभुवन आर्मीका दीलकुमार सुनार तथा महिलातर्फ एपिएफका विनिता बुढाथोकीले प्राप्त गरी नगद रु तीन÷तीन हजार पुरस्कार प्राप्त गरे । विजेता टिमका खेलाडी तथा दुबै विधामा उत्कृष्ट खेलाडीलाई गण्डकी प्रदेशसभा सदस्य राजीव पहारी, नेपाली सेनाको पश्चिम पृतनाका पृतनापति काजीबहादुर खत्री, नेपाल भलिबल सङ्घका केन्द्रीय उपाध्यक्ष यामबहादुर गुरुङ तथा सङ्घका कास्की अध्यक्ष भीम पराजुली लगायतले पुरस्कार वितरण गर्नुभएको थियो ।

प्रतियोगितामा सात प्रदेश र तीन विभागीय गरी पुरुष तर्फ १७ र महिला तर्फ १४ टोलीले सहभागिता जनाएका थिए । प्रतियोगितामा विजेता खेलाडीलाई नेपालमा आयोजना गर्ने गरी तय भएको १३औँ दक्षिण एशियाली खेलकूद प्रतियोगिता(साग) को लागि छनोट गरी बन्द प्रशिक्षणमा सहभागि गराइने बताइएको छ ।(रासस)

भीमदत्तनगर, ९ असार – आजदेखि यहाँ शुरु भएको मनसुनका कारण कञ्चनपुरको भीमत्तनगरमा जारी प्रधानमन्त्री कप महिला प्रतियोगिताको खेल प्रभावित भएको छ । आइतबार दिउँसो तय भएको सशस्त्र प्रहरीको एपिएफ क्लब र गण्डकी प्रदेशबीचको खेल वर्षाका कारण स्थगित भयो । खेल हुन नसकेपछि अङ्क बाँड्दा गण्डकी प्रदेश बाहिरिएको आयोजक महाकाली स्पोर्ट सोसाइटीका अध्यक्ष सुमन भट्टले जानकारी दिनुभयो ।

मनसुन अझै जारी रहेकाले आज बिहान हुने भनिएको प्रदेश नं १ र ३ बीचको खेल पनि हुन नसकेको अध्यक्ष भट्टको भनाई छ । “वर्षा रोकिएन भने खेल हुँदैन।” अध्यक्ष भट्टले भन्नुभयो,“तर वर्षा रोकिने सम्भावना देखिदैन ।” राष्ट्रिय खेलकूद परिषद्को सहकार्यमा ६ दिनदेखि शुरु भएको प्रतियोगितामा सात वटा प्रदेश र एपिएफ क्लब गरी आठ टिम सहभागी छन । प्रतियोगितामा उपाधि विजेता टिमले रु चार लाख नगदसहित ट्रफी र प्रमाणपत्र पाउनेछ भने दोस्रोले रु तीन लाख र तेस्रो हुनेले रु दुई लाखसहित पुरस्कृत हुने आयोजकले जनाएको छ ।(रासस)

पोर्टो अलेग्री, ९ असार  – लाउटारो मार्टिनेज र सर्जिओ अग्वेरोको गोलको मद्दतले अर्जेन्टिनाले कतारलाई २–० गोल अन्तरले पराजित गरी अर्जेन्टिना कोपा अमेरिका फुटबल प्रतियोगिताको क्वाटरफाइनलमा प्रवेश गरेको छ । ब्राजिलमा जारी कोपा अमेरिका प्रतियोगिता अन्तर्गत नेपाली समय अनुसार सोमबार बिहान भएको समूह ख कै अर्को खेलमा कोलम्बियाले पाराग्वेलाई १–० गोल अन्तरले पराजित गरेका कारण पनि अर्जेन्टिनालाई क्वाटरफाइनलमा प्रवेश सहज भएको हो ।

समूहमा दोस्रो भएको अर्जेन्टिनाले रियो दे जेनेरोको माराकाना रंगशालामा भेनेजुएलासँग क्वाटरफाइनल खेल खेल्नेछ ।  एक खेल बराबरी खेलेको कतार भने प्रतियोगिताबाट बाहिरिएको छ । तर समूह ख मा तेस्रो स्थानमा रहेको पाराग्वेले भने समूह ग को जापान र इक्वेडरबीचको खेल कुर्नु पर्नेछ ।

उत्कृष्ट नतिजा आउने तेस्रो स्थानका दुईमध्ये एक टिम क्वाटरफाइनका लागि छनौट हुनेछ । चार अंक रहेको पेरु क्वाटरफाइनलमा प्रवेश गरिसकेको छ भने जापान र इक्वेडरको खेलबाट पाराग्वेको भाग्य निर्धारित हुनेछ । एसियाली च्याम्पियन कतारले पनि गोल गर्ने राम्रा अवसर पाए पनि त्यसलाई गोलमा परिणत गर्न सकेको थिएन ।(रासस÷एएफपी)

भक्तपुर, ८ असार  – मध्यपुर थिमि नगरपालिकाको सहयोगमा मध्यपुर युथ एशोसिएशनले आयोजना गरेको ‘एमवाईए विकेण्ड ग्रासरुट फुटबल लिग’ आजदेखि सानोठिमीस्थित खेल मैदानमा शुरु भएको छ । सानैदेखि फुटबलप्रति आकर्षित गर्न छ वर्षदेखि १३ वर्ष उमेरसम्मका विद्यार्थीका लागि प्रतियोगिता आयोजना गरिएको हो ।

प्रतियोगितामा जिल्लाका १२ विद्यालयका २४ टोलीको सहभागिता रहेको एशोसिएशनका अध्यक्ष उपेन्द्रमान सिंहले बताउनुभयो । प्रतियोगीताअन्तर्गत आज १० खेल सम्पन्न भएका छन् । छ महीनासम्म प्रत्येक साता शनिबार मात्रै खेल सञ्चालन हुनेछ । “बालबालिकालाई खेलप्रति आकर्षित गर्न तथा निरोगी र अनुशासित बनाउन यसबाट सहयोग पुग्नेछ”, फुटबलका पूर्वराष्ट्रिय खेलाडी सिंहले भन्नुभयो ।

प्रतियोगिताको अखिल नेपाल फुटबल सङ्घ (एन्फा) अध्यक्ष कर्माछिरिङ शेर्पा र मध्यपुरथिमि नगरपालिकाका प्रमुख मदनसुन्दर श्रेष्ठले संयुक्त रुपमा उद्घाटन गर्नुभएको थियो । ‘शिक्षाका लागि फुटबल खेल’ नाराका साथ एन्फाले ४५ जिल्लाका एक हजार ८० विद्यालयमा प्रतियोगिता सञ्चालन गरेको हो ।(रासस)

काठमाडौँ, ८ असार –  विभागीय टोली त्रिभुवन आर्मी क्लबले फ्रेण्ड्स क्लबलाई पराजित गर्दै ललित स्मृति कप यू–१८ च्याम्पियनशिप फुटबलमा विजयी शुरुआत गरेको छ । सातदोबाटोस्थित एन्फा कम्प्लेक्समा आज भएको खेलमा आर्मीले फ्रेण्ड्सलाई २–० गोलले हराएको हो । आर्मीका लागि विशाल बस्नेत र जय अधिकारीले एक÷एक गोल गरे । विशालले खेलको चौथो मिनेटमा तथा जयले ३८औँ मिनेटमा एक गोल गरेका थिए ।

जीतसँगै समूह ‘बी’मा रहेको आर्मीले तीन अङ्क जोडेको छ । अखिल नेपाल फुटबल सङ्घ (एन्फा)का पूर्वउपाध्यक्ष ललितकृष्ण श्रेष्ठको स्मृतिमा एन्फाले प्रतियोगिताको आयोजना गरेको हो । प्रतियोगितामा ‘ए’ डिभिजनमा रहेका १४ क्लबले प्रतिस्पर्धा गरिरहेका छन् । प्रतियोगिताको विजेताले रु तीन लाख तथा उप–विजेताले रु एक लाख ५० हजार पुरस्कार प्राप्त गर्नेछ । (रासस)

भीमदत्तनगर, ८ असार- कञ्चनपुरको भीमत्तनगरमा जारी प्रधानमन्त्री कप महिला प्रतियोगिताको पाँचौँ दिनको पहिलो खेलमा सुदूरपश्चिम विजयी भएको छ । आज यहाँस्थित क्रिकेट मैदानमा भएको पहिलो खेलमा सुदूरपश्चिमले प्रदेश नम्बर ५ लाई ५१ रनले पराजित गरेको छ ।

प्रदेश नम्बर पाँचले टस जितेर फिल्डिङ रोजेपछि सुदूरपश्चिमले ब्याटिङको निम्तो पाएको थियो । सुदूरपश्चिमले १६ दशमलव एक ओभरमा अलआउट हुँदै १०१ रन बनाएको थियो । सुदूरपश्चिमका लागि कविता कुँवरले उत्कृष्ट प्रर्दशन गर्दै जितका लागि योगदान दिइन् । पच्चीस बलको सामना गरेकी कविताले आठ चौकासहित ४३ रनको योगदान गरिन् । त्यस्तै कविता जोशीले १९, रेवती धामीले नौ, निशा भट्टले आठ, मञ्जु बोकटी चार र टिम कप्तान जानकी भट्टले १० बलमा एक रन मात्रै बनाइन् ।

प्रदेश नम्बर ५ का लागि नेरी थापा र अलिसा केसीले तीन÷तीन विकेट लिए पनि टिमलाई जित दिलाउन सकेनन् । एक सय एक रनको लक्ष्य पाएको प्रदेश नम्बर ५, १६ ओभरम ५० रनमै अलआउट हुन पुग्यो । प्रदेश नं ५ का लागि लक्ष्मी चौधरीले नटआउट १२ रन बनाउनु बाहेक अन्य खेलाडीले दोहोरो अङ्क जोड्न सकेनन् ।

सुदूरपश्चिमका लागि कसिलो बलिङ गर्ने क्रममा टिम कप्तान जानकी भट्टले चार रन खर्चेर तीन विकेट लिइन् । त्यस्तै कविता कुँवर, सुनम विष्ट र लक्ष्मी साउदले समान दुई÷दुई विकेट लिए । उक्त प्रतियोगितामा प्लेयर अफ द म्याच कविता कुँवर घोषित भइन् । आजको दोस्रो खेल सशस्त्र प्रहरीको एपिएफ क्लब र गण्डकी प्रदेशबीच हुने आयोजकले जनाएको छ । (रासस)

काठमाडौँ, ६ असार  – राजधानीमा जारी उपमेयर कपअन्तर नगरपालिका महिला फुटबलमा विराटनगर महानगरपालिकाले धनगढी उपमहानगरपालिकालाई पराजित गर्दै प्रतियोगितामा सुखद शुरुआत गरेको छ ।हल्चोकस्थित सशस्त्र प्रहरी बल (एपिएफ)को मैदानमा आज भएको खेलमा विराटनगरले धनगढीलाई ४–० गोलअन्तरले पराजित गर्दै विजयी भएको हो । जीतसँगै समूह डि मा रहेको विराटनगरले शिर्ष तीन अङ्क जोडेको छ ।

विराटनगरको जीतमा रेखा पौडेलले ह्याट्रिक पूरा गरिन । उनले खेलको पहिलो हाफमा दुई गोल गरिन भने खेलको दोस्रो हाफमा एक गोल थपिन् । त्यसैगरी विराटनगरका लागि सविता मगरको नाममा एक गोल रह्यो । अखिल नेपाल फुटबल सङ्घ (एन्फा)को महिला फुटबल समितिले आयोजना गरेको उक्त प्रतियोगिताको विजेता टोलीले रु पाँच लाख तथा उपविजेताले रु तीन लाख पाउनेछन् ।

त्यस्तै प्रतियोगितामा फेयर प्ले टोलीले रु ५० हजार पाउने छन् । प्रतियोगिताको सर्वोकृष्ट खेलाडीले रु २५ हजार तथा विधागततर्फ उत्कृष्ट हुनेले जनही रु दश हजार पाउने छन् । यही असार १३ गतेसम्म चल्ने उक्त प्रतियोगितामा विभिन्न १८ टोली सहभागी छन् ।(रासस)

काठमाडौँ, ५ असार  – वीरगञ्ज युनाइटेडले स्पोर्टस् एकेडमीलाई पराजित गर्दै सहिद स्मारक ‘सि’ डिभिजन लिगमा बढुवा भएको छ । सातदोबाटोस्थित अखिल नेपाल फुटबल सङ्घ (एन्फा) कम्प्लेक्समा आज भएको ‘सि’ डिभिजन लिग छनोटअन्तर्गतको अन्तिम खेलमा वीरगञ्ज युजनाइटेडले स्पोर्टस् एकेडेमीलाई ३–१ गोल अन्तरले पराजित गर्दै सी डिभिजनमा उक्लिएको हो ।

वीरगञ्जको जीतमा चतुरधन चौधरी, उज्वल लोप्चन श्रेष्ठ र सब्वीर चौधरीले एक÷एक गोल गरे । पराजित स्पोर्टस् एकेडेमीका लागि भने कमल देउवाले एक सान्त्वना गोल फर्काएका थिए । वीरगञ्ज बढुवा भएसँगै ‘सी’ डिभिजनमा बढुवा हुने तीनै क्लबको टुङ्गो लागेको छ । यसअघि झापा फुटबल क्लब र चर्च ब्वाइज युनाइटेड फुटबल क्लब बढुवा भइसकेका छन् । एन्फाले आयोजना गरेको उक्त छनोटमा विभिन्न ३८ टोलीले सहभागिता जनाएका थिए ।(रासस)

महेन्द्रनगर, ४ असार  – कञ्चनपुरको महेन्द्रनगरमा आजदेखि शुरु भएको प्रधानमन्त्री कप महिला क्रिकेट प्रतियोगिताको दोस्रो खेल प्रदेश नं २ ले कर्णाली प्रदेशलाई नौ विकेटले हराउँदै जित हात पारेको छ । टस जितेर ब्याटिङ रोजेको कर्णालीले १९।२ ओभरमा सबै विकेट गुमाउँदै ५८ रन बनाएको थियो । कर्णालीका लागि रविना चौधरीले सर्वाधिक १३ र लक्ष्मी रिमालले आठ रनको योगदान गरेका थिए । प्रदेश नं २ का तर्फबाट शान्ति चौधरीले तीन विकेट हात पारिन भने गोमा आले, आरती चौधरी, कविता गौतम र शोभा आलेले समान एक विकेट लिए ।

प्रदेश नं २ ले ५९ रनको लक्ष्य ६।१ ओभरमा एक विकेटको क्षति बेहोर्दै सजिलै लक्ष्य भेट्टाएको थियो । प्रदेश २ का लागि शान्ति चौधरी र निरकुमारी बलमपाकीले सर्वाधिक क्रमशः १८ र १५ रन बनाएका थिए । कर्णालीका सरिता जिसीले एक विकेट हात पारिन् । म्यान अफ दि म्याच प्रदेश २ की शान्ति चौधरी घोषित भइन् ।

यही असार ११ गतेसम्म चल्ने प्रतियोगितामा प्रथम हुने टोलीलाई रु पाँच लाख र दोस्रो हुनेलाई रु तीन लाख पुरस्कार दिइने छ । प्रतियोगिताको उत्कृष्ट खेलाडी लाई रु ३० हजार तथा उत्कृष्ट बलर र ब्याट्सओमेनलाई रु १५ हजार बराबरको खेल सामग्री दिइने छ भने प्लेयर अफ द म्याचलाई रु २५ सय बराबरको पुरस्कार दिइने छ । प्रतियोगिताको व्यवस्थापन महाकाली स्पोर्टस सोसाइटीले गरेको छ ।(रासस)