बहालवाला तथा सबै पूर्व प्रधानमन्त्रीको जित

Posted By OSNepal, California, USA || Date: 11 December, 2017

प्रतिनिधिसभा चुनावमा प्रत्यक्ष तर्फ उम्मेदवारी दिएका बहालवाला र पूर्व गरी प्रधानमन्त्री भइसकेका सबै ६ जनाले जित हासिल गरेका छन्।

पाँचजना भूतपूर्व र एकजना बहालवाला प्रधानमन्त्री यसपटक चुनावी मैदानमा थिए।

पाँच पटक प्रधानमन्त्री बनिसकेका नेपाली कांग्रेसका सभापति शेरबहादुर देउवाले प्रदेश नम्बर ७ को डडेलधुराबाट २८ हजार ४ सय ४६ मत ल्याएर जितेका छन्।

त्यस्तै माओवादी केन्द्रसंग गठबन्धन गरेको नेकपा एमालेका तर्फबाट उम्मेदवारी दिएका तीनवटै पूर्व प्रधानमन्त्रीहरुले पनि फराकिलो मत अन्तरले जितेका छन्।

एमाले अध्यक्ष केपी ओलीले झापा ५ बाट ५७ हजार १ सय ३९ मत ल्याएर आफ्ना प्रतिद्वन्द्वी खगेन्द्र अधिकारी भन्दा दोब्बर बढीले जितेका छन्।

वाम गठबन्धन गरेर चुनावमा उत्रिएका माओवादी केन्द्रका अध्यक्ष तथा पूर्वप्रधानमन्त्री प्रचण्डले चितवन ३ बाट राप्रपा प्रजातान्त्रिकका विक्रम पाण्डेलाई झण्डै १० हजार मत अन्तरले हराएका छन्।

पहिलो संविधानसभा चुनावमा माओवादीका झक्कुप्रसाद सुवेदीसँग पराजित भएका माधवकुमार नेपालले यसपटक काठमण्डूको क्षेत्र नम्बर २ बाट २७ हजार ३ सय ६६ मत ल्याएर चुनाव जितेका छन्।

एमालेकै अर्का वरिष्ठ नेता तथा पूर्व प्रधानमन्त्री झलनाथ खनालले पनि इलामको निर्वाचन क्षेत्र नम्बर १ बाट ३६ हजार ८ सय ५ मत ल्याएका छन्।

पहिला माओवादी पार्टीमा रहँदा प्रधानमन्त्री भएका तथा हाल नयाँ शक्ति पार्टीका संयोजक बाबुराम भट्टराईले कांग्रेससँग मिलेर वाम गठबन्धनका तर्फबाट उठेका नारायणकाजी श्रेष्ठलाई हराएका छन्।

.

संबन्धित
भिडियो हेर्न यहाँ क्लिक गर्नुहोला!