काठमाडौं ११ पौष । नेकपा (माओवादी केन्द्र) का अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड नेकपा एमालेका अध्यक्ष केपी शर्मा ओलीलाई बहुमत ल्याएर सिंहदरबारमा पस्न चुनौती दिएका छन् ।
एक कार्यक्रममा सहभागी भएका प्रचण्डले ओलीलाई बहुमत ल्याउन चुनौती दिएका हुन् ।
‘उहाँले म सिंहदरबार बहुमत ल्याएर पस्छु भन्नुभएको छ, पसेर देखाउनुहोस । उहाँले भनेको कुरा गरेर देखाउनुभयो भने त्यसपछि म ल तपाईँले भनेको कुरा पुर्याउनुभयो भनेर बधाई भन्न आउँला । होईन, मैले भनेकोजस्तो भयो भने, गठबन्धन अगाडि गयो भने, त्यसले जनताको विश्वास लियो भने तपाईँ आउनुपर्छ भनेको छु मैले ।’ प्रचण्डले भने ।
कार्यक्रममा प्रचण्डले अहिले एमालेसँग एकता नहुने पनि स्पष्ट पारेका छन् ।
विघटन र पूनःस्थापनाको संघर्ष चलिरहेको बताएका उनले भने, ‘सबै संघर्षका पृष्ठभूमिमा अहिले तत्काललै केपीजीसँग एकता वा गठबन्धनको म कहीँकतै सम्भावना देख्दिन् । त्यो नाटकीय र कृत्रिम पनि हुन्छ । त्यसले जनतामा राम्रो सन्देश पनि दिँदैन् ।’
