आन्तरिक मामिला तथा कानूनमन्त्री केदार कार्कीले प्रदेश १ प्रदेश प्रहरी कार्यालयका प्रमुख अरुणकुमार बिसीले आफ्नो कार्यकालमा शान्ति सुरक्षाका क्षेत्रमा महत्त्वपूर्ण काम गरेको बताउनुभएको छ ।प्रहरी नायव महानिरीक्षक(डिआइजी)बाट प्रहरी अतिरिक्त महानिरीक्षक(एआइजी)मा बढुवा हुनुभएका बिसीलाई बिदाइ तथा बधाई ज्ञापन गर्दै मन्त्री कार्कीले प्रहरीसँगै सहकार्य गरेर काम गरेको बताउनुभएको हो ।
मन्त्रालयमा आयोजित कार्यक्रममा मन्त्री कार्कीले केन्द्रमा रहँदा पनि यहाँका जनतालाई केन्द्रबिन्दुमा राखेर काम गर्न आग्रह गर्दै प्रहरी समायोजनमा सहजीकरण गर्न आग्रह गर्नुभयो । सोमबार बसेको मन्त्रीपरिषद्को बैठकले बिसी, सशस्त्र प्रहरीका एक सहित ६ जनालाई एआईजीमा बढुवा गर्ने निर्णय गरेको थियो । २०४९ साल चैत्र ११ गतेदेखि नेपाल प्रहरी सेवामा लाग्नुभएका बिसीले गत असार १६ग गतेदेखि प्रदेश नं १ प्रहरी कार्यालय प्रमुखको जिम्मेवारी समाल्नुभएको थियो । प्रदेश प्रहरी कार्यालय प्रमुखको जिम्मेवारीमा रहँदा प्रदेश सरकारले गरेको सहयोगप्रति उहाँले धन्यवाद व्यक्त गर्नुभयो ।
सोही अबसरमा प्रदेश सुरक्षा समितिको बैठक पनि बसेको छ । मन्त्री कार्कीकै अध्यक्षतामा बसेको बैठकले स्थानीय तहको निर्वाचनमा खटिएका सुरक्षाकर्मी सञ्चारकर्मी, राष्ट्रसेवक कर्मचारीलाई धन्यवाद दिनेका साथै बर्षातको समयमा हुन सक्ने जोखिमलाई मध्यनजर गर्दै त्यसको पूर्व तयारीमा जुटिने निर्णय गरिएको छ ।
