२०० करोड ठगीको मुद्दामा दिल्लीको तिहाड जेलमा रहेका सुकेश चन्द्रशेखरको नाम चर्चामा छ । सुकेशका कारण विगतमा बलिउड सुपरस्टार ज्याकलिन फर्नान्डिजको नाम पनि उठेको छ । सुकेशले जेलबाट ज्याकलिनलाई कुनै न कुनै माध्यमबाट चिठ्ठी लेखेको विगतमा धेरै पटक देखिएको छ । यसैबीच सुकेश चन्द्रशेखरले अब ज्याकलिन फर्नान्डिसका लागि नयाँ प्रेमपत्र लेखेका छन् ।
हिन्दुस्तान टाइम्सका अनुसार मनी लान्ड्रिङ मुद्दामा तिहाड जेलमा सजाय काटिरहेका सुकेश चन्द्रशेखरले आफ्ना वकिल अनन्त मलिकमार्फत नयाँ पत्र लेखेका छन् । अभिनेत्री ज्याकलिन फर्नान्डिसका लागि लेखिएको यो पत्र निकै ठूलो छ । रिपोर्टका अनुसार यस पत्रमा सुकेश चन्द्रशेखरले ज्याकलिनका लागि लेखेका छन् – मेरो माया, मेरो बेबी ज्याकलिन, मैले भर्खरै भएको अवार्ड शोमा तिम्रो अभिनय देखेँ जुन साँच्चै अचम्मको थियो, म तिमीसँग धेरै मायामा परें।
म तिमीलाई मेरो जीवनमा पाएकोमा धेरै भाग्यशाली महसुस गर्छु। तिम्रो जन्मदिन विशेष बनाउन मैले एउटा सुपर प्लान तयार गरेको छु। म तिमीलाई पागल जस्तै माया गर्छु र मलाई राम्रोसँग थाहा छ कि तिमी पनि मलाई माया गर्छौ। सत्यतथ्यको काउन्टडाउन सुरु भएको छ । चिन्ता नगर। यसरी सुकेशले ज्याकलिन फर्नान्डिसको बारेमा आफ्नो मनको कुरा गरेका छन् । ज्याकलिन फर्नान्डिसको बारेमा सुकेश चन्द्रशेखरको यो पहिलो पत्र होइन।
यसअघि इस्टरको अवसरमा सुकेशले ज्याकलिनलाई यस्तै पत्र लेखेका थिए । सुकेश चन्द्रशेखर २०० करोडको मनी लान्ड्रिङ प्रकरणमा मुख्य अभियुक्त हुन् र ज्याकलिन फर्नान्डिज उनीसँगको सम्बन्धलाई लिएर ईडीको रडारमा थिइन् । जसका कारण उनको नाम पनि यो मुद्दामा परेको छ ।
