विजय थापा । अमेरिकाको डिसी महानगर क्षेत्रमा करिव एक दशक भन्दा बढी समय देखि बस्दै आएका चित्रकार राजेन्द्र केसी टेक्ससमा सम्पन्न अन्तरराष्ट्रिय चित्रकला प्रतियोगितामा उत्कृष्ट नव कलाकार घोषित भएका छन् ।
टेक्सस राज्यको सान एञ्जेलो शहरमा गत अक्टोबर २१- अक्टोबर २९ सम्म आयोजना भएको उक्त अन्तरराष्ट्रिय प्रतियोगितामा भाग लिने केसी एक मात्र नेपाली मूलका हुन् । एन प्लेन एयर टेक्ससको नवौ बार्षिक प्रतियोगिता एक प्रतिष्ठित अन्तर्राष्ट्रिय ज्युरीड प्रतियोगिता हो ।
उक्त प्रतियोगिता सहभागी हुन् छनौट हुनु पर्ने भएकोले डिसी क्षेत्रबाट ४ जना छनौट भएका मध्ये केसी पनि परेका थिए । उक्त प्रतियोगितामा बिजेताहरुलाई बिभिन्न विधामा पुरस्कारहरु प्रदान गरिएको छ ।
कलाकार केसीलाई बेस्ट न्यू आर्टिस्ट अर्थात् उत्कृष्ट नव कलाकारको रुपमा घोषणा गरिएको छ । केसी डिसी क्षेत्रबाट सहभागी हुन् टेक्सस गएका हुन् भने आयोजकले नै सम्पूर्ण खर्च गरेको केसीले बताए । उनले हर्ष व्यक्त गर्दै अन्तरराष्ट्रिय चित्रकला प्रतियोगितामा सहभागी भै नेपाल र नेपालीको नाम प्रकाश पार्न सकिएकोमा गर्व लागेको ईनेप्लिजलाई बताए ।
उनले सबैको समर्थन ,हौशला र उत्प्रेरणा र आफ्नो मेहनतको कारण १०० बर्ष ईतिहास बोकेको अन्तरराष्ट्रिय चित्रकला प्रतियोगितामा सहभागी भै पुरस्कार हासिल गर्न सक्नु नै ठूलो कुरा भएको उनले भने ।
उनको १० दिने टेक्सस बसाईमा उनले ५ दिनमा बनाएका १२ वटा चित्रहरु पुरै बिक्रि भएका छन् ।काठमाडौँ जावलाखेल घर भै भर्जिनियाको फल्स चर्चमा बस्दै आएका कलाकार केसीले बिगतमा पनि थुप्रै पुरस्कारहरु हात पारि सकेका छन ।सन् १९९६ देखि नै व्यावसायिक चित्रकारिता पेशामा संलग्न भएका केसी अमेरिकामा जम्दै छन् ।
