धरान (सुनसरी), २३ फागुन : स्थानीय व्यवसायीका उत्पादनलाई प्रवद्र्धन गर्ने उद्देश्यले सुनसरी उद्योग वाणिज्य सङ्घले धरानमा आयोजना गरेको व्यापारिक मेला धरान एक्स्पोमा रु १२ करोडको आर्थिक कारोबार भएको छ ।
फागुन ११ गतेदेखि सुरु भएको एक्स्पोमा आज समापन भएसँगै रु १२ करोड बराबरको कारोबार भएको आयोजक सुनसरी उद्योग वाणिज्य सङ्घका महासचिव महेन्द्र प्रधानले राससलाई जानकारी दिनुभयो । उहाँका अनुसार एक्स्पो एक लाख ८० हजार जनाले अवलोकन गरेका छन् । अघिल्लो वर्ष सङ्घले आयोजना गरेको एक्स्पोमा रु १० करोडको कारोबार भएको थियो । यसपटक अघिल्लो वर्षको तुलनामा दुई करोड कारोबार वृद्धि भएको हो ।
आज उत्सवको समापन कार्यक्रममा प्रमुख अतिथिका रुपमा कोशी प्रदेशसभाका सदस्य रमेशकुमार बस्नेतले एक्स्पोका माध्यमबाट स्थानीय व्यापारी व्यवसायी र उपभोक्ताबीच पुलको काम गरेको बताउनुभयो ।कार्यक्रममा विशेष अतिथिका रुपमा धरान उपमहानगरपालिकाका उपप्रमुख आईन्द्रविक्रम बेघाले धरान एक्स्पोले बजारको पुँजी चलायमान बनाउन महत्वपूर्ण भूमिका खेलेको बताउनुभयो । एक्स्पोले आर्थिक गतिविधि बढाउन मात्र नभई धरानको कला, संस्कृति प्रवद्र्धन गर्न पनि सहयोग पु¥याएको बताउनुभयो । आयोजक सुनसरी उद्योग वाणिज्य सङ्घका अध्यक्ष विजय श्रेष्ठले हरेक वर्ष धरान एक्स्पोलाई निरन्तरता दिन सबै पक्षको सहयोग आवश्यक रहेको बताउनुभयो ।
