काठमाडौं २२ भदौ । नेकपा एकीकृत समाजवादीको संसदीय दलको बैठक भोलि भदौ २३ गते बुधवार दिउँसो २ बजे नयाँबानेश्वरस्थित संसद् भवनको शंकर हलमा बस्ने भएको छ ।
बुधवारदेखि शुरू हुने दुवै संसद्को बैठकमा पार्टीले संसद् सञ्चालनसम्बन्धी रणनीति बनाउन बैठक बस्न लागेको नेता जीवनराम श्रेष्ठले जानकारी दिए ।
नेकपा एमालेका अध्यक्ष केपी शर्मा ओली प्रधानमन्त्री हुँदा पटक–पटक प्रतिनिधिसभा विघटन गरेपछि असन्तुष्ट बनेका केही नेता पार्टीबाट अलग भएर स्थापना गरेको एकीकृत समाजवादीले पहिलोपटक संसद्को बैठकमा सहभागी हुनेछ ।
यसअघि पार्टीले दलको नेतामा माधवकुमार नेपाललाई जिम्मेवारी दिएको थियो ।दल निकट समाजवादी प्रेसले १५१ सदस्यीय कार्यसमितिको विधान तयार गरिसकेकाले चाँडै जिल्ला प्रशासन कार्यालय काठमाडौंमा दर्ता गर्ने जनाएको छ ।
