काठमाडौं, २३ असार:
मलेसियामा दुई मैत्रीपूर्ण खेलसँगै थाइल्यान्ड पुगेको न्युरोड टिम एनआरटीले बिहीबार स्थानीय कासेम बन्डित युनिभर्सिटीसँग खेल्दैछ ।
खेल नेपाली समयअनुसार अपरान्ह पौने ३ बजे सुरु हुनेछ । गत संस्करणको सहिद स्मारक ए डिभिजन लिगमा तेस्रो स्थान हासिल गरेको एनआरटीले लिग अघि तयारी गर्न मलेसिया र थाइल्यान्ड पुगेको हो ।
यसपछि एनआरटीले थाइल्यान्डमा दुई खेल खेल्नेछ । यसअघि मलेसियामा भएको टीवाईटी कपमा सहभागी भएको एनआरटी दुबै खेलमा पराजित भएको थियो । पहिलो खेल ५–१ ले पराजित एनआरटी दोस्रो खेलमा ५–० ले पराजित भएको थियो ।
