काठमाडौँ – महाकवि लक्ष्मीप्रसाद देवकोटाले रचना गरेको गजलको श्रव्यदृश्य सार्वजनिक गरिएको छ । मैतीदेवीमा रहेको देवकोटा सङ्ग्रहालयमा शुक्रबार आयोजित कार्यक्रममा प्रा डा कृष्णहरि बरालले उक्त गजलको श्रव्यदृश्य सार्वजनिक गर्नुभयो । महाकावि देवकोटाको नाटक ‘सावित्री सत्यवान’ मा रहेको ‘आकाशमा शशी छन्’ गजललाई गायक सन्तोष श्रेष्ठको स्वरमा बजारमा ल्याइएको हो ।
प्रा डा बरालले आफूले विद्यावारिधि गर्ने क्रममा फेला पारेको देवकोटाको उक्त गजल श्रेष्ठले रेकर्ड गरेर सार्वजनिक गरेकामा खुसी व्यक्त गर्नुभयो । अरबदेखि भारत हुँदै नेपाल छिरेको गजलले नयाँ बाटो बनाउँदै गएको उल्लेख गर्दै उहाँले महाकवि देवकोटाको कृतिबारे चर्चा गर्नुभयो ।
समालोचक घनेन्द्र ओझाले गजलमाथि टिप्पणी गर्दै महाकवि देवकोटाले गजल भनेर रचना नगरे पनि उक्त रचना गजलको संरचनामा रहेको बताउनुभयो । झण्डै एक सय वर्षअघि लेखिएको देवकोटाको गजल पूर्णतः शास्त्रीय संरचनामा रहेको उल्लेख गर्दै उहाँले महाकविको गजल रेकर्ड भएर आउनु समग्र गजल प्रेमीका लागि खुसीको कुरा भएको बताउनुभयो ।
महाकवि देवकोटाका छोरा प्रा डा पद्मप्रसाद देवकोटाले आफ्ना पिताको सृजनालाई सङ्गीतबद्ध र स्वरबद्ध गरेर बाहिर ल्याएकामा खुसी व्यक्त गर्नुभयो । कार्यक्रममा महाकवि देवकोटाकी छोरी अम्बिकादेवी रिमालको समेत उपस्थिति थियो । हेम प्रभास अधिकारीको निर्देशन तथा वीरेन्द्र भाट ‘विपीन’को छायाङ्कन र सम्पादन गरेको श्रव्यदृश्यमा श्रेष्ठ स्वयंले अभिनय गर्नुभएको छ ।
